Almatyda álimjettikten japa shekken oqýshylar óz ómiri týraly baıandady
Sarapshylardy oqýshylardyń birin-biri uryp, vıdeosyn jarııalaıtyn salqynqandylyǵy alańdatyp otyr. Jıyn barysynda klastastarynyń tepkisine tap bolǵan oqýshylar ishki syryn aqtardy.
16 jastaǵy Shyńǵys 5 jyl buryn osyndaı kúıdi basynan ótkergen.
«Bul 5-klassta boldy. Tehnıkalyq lıtseıde oqyp júrgen bolatynmyn. Klastastarym maǵan qysym jasaıtyn. Iterip, uryp-soǵyp, mazaqtap, kúlki qylatyn. Qandaı jaǵdaı bolmasyn men kináli bolatynmyn. Basymdaǵy problemamdy eshkimge aıtpadym. Ózim sheshemin dep oıladym. Kúnderdiń kúninde bir dosym muny muǵalimge aıtyp qoıdy, sosyn ata-anam bildi. Olar meni basqa mektepke aýystyrǵysy keldi. Birneshe jınalys, olardyń ata-analarymen áńgime ótkizildi. Sodan klastastarym meni kelemejdeýdi toqtatty. Menen de álsiz adam bolsa, ol ózine-ózi qol jumsaýy múmkin edi», - dedi oqýshy.
Qazaqstannyń ıÝNISEF janyndaǵy bilim berý jáne balalar quqyǵyn qorǵaý baǵdarlamasynyń úılestirýshisi Tatıana Aderıhına Qazaqstanda ár úshinshi oqýshy klastastarynyń mazaǵyna aınalyp otyrǵanyn aıtty.
ıÝNISEF málimeti boıynsha, Qazaqstannyń 40 mektebindegi 402 oqýshynyń 33,0%-y, ıaǵnı ár úshinshi oqýshy mekteptegi zorlyqtyń qurbany bolyp otyr.
«Ókinishke oraı, mektepterdegi álimjettik Qazaqstanda ǵana emes búkil álemde úlken problema bolyp otyr. Barlyq bala ony áke-sheshesine aıtpaıdy. Bul jerde keshendi áreket kerek. Ata-anasy balanyń kóńil-kúıine qyraǵy bolýy tıis. Biz 2015 jyldan bastap oqýshylardyń psıhıkalyq densaýlyǵyn qalyptastyrý boıynsha pılottyq baǵdarlama iske qosyldy. Qazir bul joba testilik rejimde Mańǵystaý, ShQO, OQO-da jumys jasap jatyr. Mektepterde qaýipsizdik komandalary quryldy. Oǵan mektep ákimshiligi, psıholog, muǵalim, ýchaskelik polıtsııa kiredi», - dedi Qazaqstannyń ıÝNISEF janyndaǵy bilim berý jáne balalar quqyǵyn qorǵaý baǵdarlamasynyń úılestirýshisi Tatıana Aderıhına.
Sarapshynyń aıtýynsha, bul baǵdarlama testilik rejimnen soń Qazaqstan Úkimetine qaraýǵa jiberiledi. Eger úkimet maquldasa, joba Qazaqstannyń barlyq mektepterinde engiziledi.
Aıta ketý kerek, mektepterdegi zorlyq-zombylyqtyń aldyn alý baǵdarlamasy ShQO, Mańǵystaý, OQO júrgizilip keledi. Vedomstvoaralyq komıssııa bul jobaǵa Aqtóbe oblysyn da qosýdy sheshti.