Almatyda alǵashqy 46 mınýtta 15 myń bala tegin úıirmege kezekke turyp úlgerdi

ALMATY. QazAqparat - Almatyda balalardy tegin úıirme men sektsııaǵa kezekke qoıatyn DamuBala platformasynda 46 mınýt ishinde búkil oryndar tolyp qoıdy, dep habarlaıdy QazAqparat.

Eske sala keteıik, 2 mamyr kúni DamuBala platformasy durys jumys istemegen soń ata-analar balasyn kezekke turǵyza almaǵan edi.

Platforma tek 3 mamyr, sársenbi kúni 18.00-de iske qosyldy.

«Birinshi kezeńde vaýcher alý úshin balalaryn kezekke tirkep úlgergenderdiń bárin quttyqtaımyz. 46 mınýtta Almatyda 15 myń bala kezekke tirkeldi. Ata-analar júıedegi jeke kabınetinde balalarynyń kezekte turǵan nómirin baqylaı alady. Jaqyn ýaqytta balany kezekke jazýdyń ekinshi kezeńi habarlanady. Bıýdjet kólemi sheńberinde kezek qalyptasqan soń tirkelgen balalarǵa vaýcher beriledi. Osydan keıin qyzmet kórsetýshilerge qajetti qujattardy jınap, olardy júıege engizý úshin 10 kún beriledi. Qyzmet kórsetýshige qajetti qujattar tapsyrylǵan soń ol turaqty vaýcherdi óz tarapynan belsendiredi» dep túsindirdi baǵdarlama operatory Instagram paraqshasynda.