Almatyda alǵash ret patsıentke jasandy júrek salyndy

ALMATY. QazAqparat - Almatydaǵy kardıologııa jáne ishki aýrýlar ǵylymı-zertteý ınstıtýtynda alǵash ret 60 jastaǵy patsıentke LVAD - sol jaq qarynshanyń mehanıkalyq qosalqy qurylǵysy ımplantatsııalandy, dep habarlaıdy QazAqparat tilshisi.

Almaty oblysynyń turǵyny 60 jastaǵy Ǵappar Qalıev sońǵy eki jylda júrek jetkiliksizdigimen aýyrdy.

Bir aıdan astam ýaqyt ol kardıologııa ǴZI statsıonarynda jatty.

Dárgerlerdiń sózinshe, naýqasty entigý men keýdeniń qysylýy, aıaqtyń isinýi jáne búırek problemalary mazalaǵan. Munyń bári ólimge ákelýi múmkin edi.

«Operatsııa sátti ótti. Qazir ózimdi jaqsy sezinem, aıaqtyń isinýi, entigý, bas aýrýy basyldy, uıyqtaıtyn boldym. Dárigerlerge alǵysym sheksiz», – deıdi patsıent.

Klınıkanyń birinshi basshysynyń aıtýynsha, eki tútigi bar, bireýi qolqaǵa, ekinshisi júrektiń sol jaq qarynshasyna qosylǵan shaǵyn sorǵy sol jaq qarynshanyń qyzmetin atqarady.

LVAD uzaǵyraq ómir súrýge, burynǵy ómir saltyna oralýǵa jáne ómir súrý sapasyn jaqsartýǵa múmkindik beredi.

Jasandy júregi bar naýqastyń basqa adamdardan aıyrmashylyǵy – onyń tamyr soǵysy bolmaıdy.

«Bul operatsııany bizdiń klınıkanyń kardıohırýrgtary Astana qalasyndaǵy ulttyq kardıohırýrgııalyq ǵylymı ortalyqtaǵy áriptesterimen birlesip jasady. Biz júrekke joǵary tehnologııalyq operatsııalardyń barlyq túrin jasaımyz. Keleshekte júrek patologııasyn emdeýdiń jańa zamanaýı ádisterin ulǵaıtýdy jáne odan ári engizýdi josparlap otyrmyz», - dep atap ótti dáriger.

Kardıologııa jáne ishki aýrýlar ǴZI basqarma tóraǵasy Roza Qýanyshbekova operatsııadan keıin otbasynyń qoldaýy men kómegi óte qajet, patsıenttiń ózi jáne onyń týǵandary kúndelikti dári-dármek pen turaqty medıtsınalyq kútimdi qamtıtyn erejelerdi qatań saqtaýy kerek ekenin atap ótti.