Almatyda alǵash ret qutqarýshylar alleıasy paıda boldy
Almaty garnızonynyń tarıhynda alǵash ret TJD qutqarýshylaryna arnalǵan alleıa paıda boldy.
«Otan qorǵaýshylar kúni men Jeńis kúni qarsańynda Almaty qalasy tótenshe jaǵdaılar departamenti 600-den astam aǵash otyrǵyzdy. Aǵash otyrǵyzýǵa jalpy aýmaǵy 0,4 ga ýchaske bólindi. Qutqarýshylar alleıasy Esentaı ózeni men S. Muqanov kósheleriniń ortasynda Bógenbaı batyr kóshesiniń boıynda ornalasqan. Atalǵan aýmaqqa Qutqarýshylar kúnine arnalǵan eskertish ornatý josparda. Otan qorǵaýshylar kúni men Jeńis kúni qarsańynda barlyǵy 100 túp aǵash pen 500 túp buta otyrǵyzyldy. Aýmaqty negizinen japyraqty aǵashtardyń qyzyl úıeńki, shyrsha, sándik jumaq tárizdes túrleri men sándik butalar bezendirip turdy» delingen habarlamada.
Skverde jaıaý júrginshiler joly salynady, oryndyqtar qoıylyp, kógaldandyrylyp, kelýshilerge barlyq jaǵdaı jasalmaq.
Aldaǵy jyldary otyrǵyzylǵan kóshetterdi sýaryp qorektendirýge jáne profılaktıkalyq óńdeýler jasaý úshin keshendi kútim júrgizý qarastyrylǵan.
«Biz jyl saıyn ártúrli baǵyttaǵy ekologııalyq aktsııalardy qoldap otyramyz. Aǵash kóshetterin otyrǵyzý sharalaryna qyzmetkerler de kóptep qatysyp bizdiń mekeme úshin jaqsy dástúr bolyp qalyptasty. Búgingi ekken taldarymyz- Uly Otan soǵysynda erlik kórsetken jaýyngerlerge jasalǵan qurmet qana emes, qorshaǵan ortany qorǵaýǵa da qosqan úlesimiz» - deıdi qalalyq Tótenshe jaǵdaılar departamentiniń bastyǵy Rýslan Qasybaev.
Sonymen qatar, ol Otan qorǵaýshylar kúni men Uly Jeńistiń 76-jyldyǵyna oraı soǵys ardagerlerine, tyl eńbekkerleri men olarǵa teńestirilgen tulǵalarǵa qurmet kórsetiletinin atap ótti.
«Uly Jeńis týraly estelikter bizdiń júregimizde máńgi saqtalady. Jeńis týyn jelbiretken erlerimiz ben jeńis qarýyn qoldan jasap úles qosqan tyl eńbekkerlerine úlken qurmetpen basymyzdy ıemiz. Bizdiń uıymdaǵy ózderiniń qyzmettik mindetterin adal atqaryp zor qurmetke ıe bolǵan, búginde mol tájirıbelerimen jas urpaqqa úlgi bolyp otyrǵan ardagerlerimizdi de erekshe quttyqtaǵym keledi»,- dedi departament basshysy.
Alleıanyń saltanatty ashylýynda soǵys ardagerleri men tyl jáne azamattyq qorǵaý ardagerlerine qurmet kórsetildi.
Atalǵan aktsııaǵa órtke qarsy qyzmet kórsetetin Almaty garnızonynyń qyzmetkerleri men qalalyq jasyl ekonomıka basqarmasynyń basshysy Natalıa Lıvınskaıa qatysty.
Aǵash otyrǵyzý jáne aktsııa ótkizý barysynda sanıtarlyq-epıdemıologııalyq talaptardyń saqtalýyna erekshe nazar aýdaryldy.