Almatyda áleýmettik osal toptaǵy azamatqa qandaı qoldaý kórsetiledi
Aıtýynsha, osy maqsattarǵa bıýdjetten 2023 jyldyń sońyna deıin 3,3 mlrd teńge bólinedi. Ótelim tarıf ósiminiń barlyq aıyrmashylyǵyn jabady.
«Almatyda halyqtyń áleýmettik osal toptary (HÁOT) sanatyna jatatyn 315 myń azamat turady. Atalǵan tulǵalardy qoldaý aıasynda biz tarıfterdi kóterý úshin ótemaqy tóleýdi josparlap otyrmyz», - dep naqtylady Asqar Ámrın.
Ótemaqy sýmen jabdyqtaý, sý burý, gaz, jylytý sııaqty qyzmetterdiń 12 túri boıynsha tarıfterdiń kóterilý aıyrmashylyǵyn jabatyn bolady.
«Ol Memleket basshysynyń tapsyrmasy boıynsha «Investıtsııalarǵa aıyrbastaý tarıfi baǵdarlamasyna kóshý aıasynda kommýnaldyq qyzmetter baǵasynyń shamaly ósýi jyl saıyn jylýmen jabdyqtaý kommýnıkatsııalaryn 2-2, 5%-ǵa, sýmen jabdyqtaý 2%-ǵa jáne elektrmen jabdyqtaý 1,2%-ǵa jóndeýge jáne ózgertýge múmkindik beredi. Osylaısha megapolıstiń turǵyndary sapaly ınjenerlik jelilermen qamtamasyz etiledi», - dedi Asqar Ámrın. Ótemaqyǵa qujattardy aýdandyq ákimdikter men Almaty qalasynyń Jumyspen qamtý jáne áleýmettik baǵdarlamalar basqarmasy qabyldaıdy. Tólemder ótinish berýshilerdiń shottaryna ekinshi deńgeıdegi bankter arqyly túsetin bolady.
Mysaly: páteri 40 sharshy metr bolatyn azamattarǵa tarıfterdiń ósýi 110%-ǵa 60 sharshy metr – tarıfterdiń 90%-y, 70 sharshy metr tarıfterdiń 80%-y jabylady. Osy erejeler jyl sońyna deıin qoldanysta bolady, odan ári uzartý Almaty qalasynyń 2024-2026 jylǵa arnalǵan bıýdjetin ázirleý kezinde qaralady.
Almaty qalasy boıynsha halyqtyń áleýmettik osal toptary sanattaryna jatatyndar:
UOS aradgerleri – 54 adam. (0,02%); basqa memleketter aýmaǵyndaǵy áskerı is-áreketterdiń ardagerleri - 2978 adam (0,94%); UOS ardagerdlerine teńestirilgender – 1538 adam (0,48%); Birinshi jáne ekinshi toptaǵy múgedekter – 28 433 adam. (8,9%); Múgedek balasy bar otbasylar nemese olardy tárbıeleýshiler – 8591 adam (2,71%); «Altyn alqa», «Kúmis alqa» tósbelgisimen marapattalǵandar, kópbalaly analar – 35 562 adam (11,2%); Memlekettik nemese qoǵamdyq mindetterdi, áskerı qyzmetti atqarý kezinde, ǵarysh keńistigine ushýdy daıyndaý nemese júzege asyrý kezinde, adam ómirin qutqarý kezinde, quqyqtyq tártipti qorǵaý kezinde qaza tapqan (qaıtys bolǵan) adamdardyń otbasylary, – 534 adam (0,16%); jasy boıynsha zeınetkerler – 237 740 adam (75,1%).
Buǵan deıin Ulttyq ekonomıka mınıstrligi Tabıǵı monopolııalardy retteý komıteti Almaty qalasy boıynsha departamentiniń basshysy Ásel Bódeneeva «Investıtsııalarǵa aıyrbastaý tarıfi» baǵdarlamasy sheńberinde kommýnaldyq qyzmetter tarıfi ózgeretini týraly aıtqan edi.
Onyń sózinshe, departament tabıǵı monopolııalardyń bazalyq sýbektileriniń sýmen jabdyqtaý jáne sý burý, jylý energııasyn óndirý, jylý energııasyn berý, bólý jáne jabdyqtaý, elektr energııasyn berý qyzmetteri boıynsha qoldanylý merzimi aıaqtalǵanǵa deıin tarıfterdi ózgertýge ótinimderdi, sondaı-aq elektr energııasyn jabdyqtaý baǵasynyń aldaǵy ýaqytta kóterilýi týraly habarlamany qaraǵan.
«Almaty Sý» ShJQ MKK sýmen qamtý qyzmetiniń tarıfi, ortasha tarıf sýdyń tekshe metri úshin 63,08 teńgeden 88,09 teńgege deıin kóbeıdi.
«Turǵyn aýdany 30 m2 bolatyn 1 bólmeli páterdi sýyq sýmen jabdyqtaý boıynsha 43 teńge jáne káriz úshin 41 teńge boldy. Turǵyn aýdany 55 m2 bolatyn 2 bólmeli páterdi sýyq sýmen jabdyqtaý boıynsha 65 teńge jáne káriz úshin 60 teńge. Sýyq sýmen jabdyqtaý boıynsha turǵyn aýdany 70 m2 bolatyn 3 bólmeli páterdi qamtý 86 teńge jáne káriz úshin 81 teńge», - dedi Ásel Bódeneeva.
Jylytý kezeńinde úıge ortaq jylý energııasyn esepteý aspaptary joq tutynýshylar úshin jylytý jáne ystyq sýmen jabdyqtaý úshin artyq tólem: turǵyn aýdany 30 m2 bolatyn 1 bólmeli páterge - 1 032 teńge; turǵyn aýdany 55 m2 bolatyn 2 bólmeli páterge - 1 989 teńge; turǵyn aýdany 70 m2 bolatyn 3 bólmeli páterge - 2 402 teńge, onyń ishinde ystyq sýmen jabdyqtaý boıynsha 90 teńge kóleminde.