Almatyda áleýmettik mańyzy bar azyq-túlik baǵasy turaqty

ALMATY. QazAqparat – Almaty qalalyq Kásipkerlik jáne ınvestıtsııalar basqarmasy basshysynyń orynbasary Qarlyǵash Ábdijabbarova onlaın brıfıng barysynda megopolıstegi áleýmettik mańyzy bar azyq-túlik baǵasyn ustap turý úshin qandaı sharalar qolǵa alynǵanyn aıtty, dep habarlaıdy QazAqparat tilshisi.

«Aýdandyq ákimdikter apta saıyn negizgi 29 saýda nysandarynda monıtorıng júrgizedi. Olar - azyq-túlik bazarlary, iri dúkender men «Altyn orda» kóterme bazary. Baǵalardy negizsiz ósirgen jaǵdaıda túsindirý jumystaryn júrgizemiz. Al taýar jetkizýshiler baǵany kótergen bolsa, aımaqtardan basqa jetkizýshilerdi tabýǵa keńes beremiz. Tamyz aıynyń basynan beri jedel sharalardyń arqasynda áleýmettik mańyzy bar 5 taýar túrine baǵalar anaǵurlym tómendetildi. Bul kúrish, kartop, pııaz, qant jáne qaraqumyq jarmasy»,- deıdi Qarlyǵash Ábdijabbarova.

Sonymen qatar, ol Almaty qalasynyń azyq-túlik beldeýin qamtamasyz etý sheńberinde 2017 jyly pılottyq baǵdarlama júzege asyrylǵanyn atap ótti. Bul kásipkerlerge jeńildetilgen nesıe berý arqyly baǵalardyń ósýin ustap turý úshin iske qosylǵan joba.

«Karantın alǵash jarııalanǵan kezde óńirlerdegi aýyl sharýashylyǵy ónimderin birden saýda oryndaryna aparý máselesi qolǵa alyndy. Qazir ónimder deldalsyz tikeleı saýda oryndaryna jetkizilýde. Oǵan qosa sıyr etin de tómendetilgen baǵamen ákelinýde. Sondaı-aq, qaladaǵy azyq-túlik óndiretin mekemeler memleket tarapynan sýbsıdııalanyp jatyr, sonyń nátıjesinde olarmen baǵany kótermeýge kelisim jasaldy. Jasalǵan memorandýmdar sheńberinde 27 saýda nysanynda áleýmettik mańyzy bar azyq-túlik taýarlarynyń baǵasyna qoıylatyn saýda ústemesin 15%-dan asyrmaı saqtalýynyń monıtorıngi júrgiziledi», - deıdi ol.

Onyń aıtýynsha, áleýmettik mańyzy bar azyq-túlik taýarlaryn óndirýshi 6 kásiporynǵa sýbsıdııalaý túrinde memlekettik qoldaý kórsetilgen.

« Bıyl qaladaǵy «Maslo-Del» JShS, «Bekker ı K» JShS, «MZ Solnechnyı» JShS, «RG Brands» JShS, «EFK» AQ, «Asyl Tuıaq» KH 500 mln teńgeden astam somada sýbsıdııa aldy. Qazirgi ýaqytta, 5 kásiporynnan kelip túsken 350 tapsyrys pysyqtalýda, sýbsıdııanyń jalpy somasy 800 mln teńgeni quraıdy bul 41,9 mlrd teńge ınvestıtsııa tartýǵa múmkindik beredi», - dep qorytyndylady Almaty qalalyq Kásipkerlik jáne ınvestıtsııalar basqarma basshysynyń orynbasary Qarlyǵash Ábdijabbarova.