Almatyda áleýmettik mańyzy bar azyq-túlik baǵasy ósken joq

ALMATY. QazAqparat - 2020 jyldyń eń mańyzdy mindetteriniń biri - áleýmettik mańyzy bar azyq-túlik taýarlarynyń baǵalaryn tejeý mindeti oryndaldy, dep habarlaıdy QazAqparat tilshisi.

Azyq-túlik qaýipsizdigin qamtamasyz etý Almaty ákimdigi jumysyndaǵy basymdyqtardyń biri.

Onyń ishinde 19 atalym boıynsha baǵalar baqylaýda boldy.

Baǵdarlama jeke saýda-bólshek saýda jelisi, sondaı-aq seriktesterdiń saýda jelileri arqyly júzege asyryldy. Qorlar tek otandyq ónimderden turady. Baǵalardy tejeý úshin túrli mehanızmder qoldanylady.

28 saýda pavılony men 11 «demalys kúngi» jármeńkesi arqyly azyq-túlik taýarlarynyń negizgi túrleri, onyń ishinde 19 túrli azyq-túlik satylady.

Onda 15%-dan aspaıtyn shekti saýda ústemeleri belgilengen. Ónim baǵasy qala boıynsha ortasha naryqtyq baǵadan 10-20%-ǵa tómen.

TJ men karantındi engizý qajetti taýarlarǵa suranystyń artýyna sebep boldy. Almatyda suranysqa ıe bola bastaǵan negizgi ónimderdiń biri qaraqumyq jarmasy boldy. Sondyqtan halyqtyń suranysyn qamtamasyz etý úshin Almaty áleýmettik kásipkerlik koroporatsııasy (ÁKK) turaqtandyrý qorynan 348,1 tonna kóleminde qaraqumyq jarmasynyń ınterventsııasyn ótkizdi. Taýar saýda jelileri arqyly 305 teńge/kg baǵa boıynsha satyldy, al sol kezdegi ortasha naryqtyq baǵa 339 teńge/kg bolǵan.

Saýda jelileri, áleýmettik pavılondar men «demalys kúngi» jármeńkeleri arqyly 235 tg/kg (sórede 240 tg/kg) baǵamen 1 500 tonna kóleminde qant boıynsha taýar ınterventsııasy júrgizildi.

Sonymen qatar, 2019 jyly Almaty ÁKK 2 000 tonna kóleminde qant satyp aldy. Osy jyly bul kólem satyp alý baǵasy boıynsha 215 tg/kg (sórede 220 tg/kg) satyldy.

Kásipkerlik sýbektilerine jeńildetilgen qaryzdar beriledi. Osy tetiktiń sheńberinde kásipkerlik sýbektileri áleýmettik mańyzy bar azyq-túlik taýarlaryn ótkizý boıynsha qatań mindettemelerdi oryndaıdy. Sonymen qatar seriktester qaryzdar boıynsha bólingen aqshany Almaty ÁKK bıýdjetine qaıtarady.

Osy «aınalymdy» keste boıynsha myna kásipkerlik sýbektilerimen sharttar jasaldy:

- «Magnum Cash&Carry» JShS áleýmettik mańyzy bar azyq-túliktiń 10 pozıtsııasyna (qaraqumyq, tútik kespe, 1-surypty un, kúrish, taýyq eti, jumyrtqa, sút, aıran, súzbe, sary maı) 2,112 mlrd teńge jalpy somasyna 5,9 myń tonna kóleminde;

- «Magnum Cash&Carry» JShS kókónis ónimderine (kartop, qyryqqabat, sábiz, pııaz) 1,709 mln teńge jalpy somasyna 14 608 tonna kóleminde;

- «Sabyrjan Company» JShS JShS áleýmettik mańyzy bar azyq-túliktiń 7 pozıtsııasyna (1-surypty un, nan, qaraqumyq, kúrish, tútik kespe, taýyq eti, sary maı) 255 mln teńge jalpy somasyna 912 tonna kóleminde;

- «Aqsaı» nan-toqash kombınaty» JShS qalypty nanǵa 1 mlrd teńge jalpy somasyna 23,8 myń tonna kóleminde;

- Asyl Meat» JShS sıyr etine (jaýyryn-tós bóligi) 42 mln teńge jalpy somasyna 63,7 tonna kóleminde.

Keshendi sharalardyń arqasynda 2020 jyly Almaty tutyný baǵalarynyń tómen ındeksterine jáne respýblıkadaǵy nan baǵasynyń eń tómen deńgeıine jetti.