Almatyda áleýmettik ıdeıalar men jobalar jármeńkesi ótip jatyr
dep habarlaıdy QazAqparat.
Jármeńkege qatysýshylar óz ıdeıalaryn usynyp, beıne taspada jobalarynyń tusaýkeserin jasaýda.
«Jármeńkege jeti baǵyt boıynsha 230-dan asa jobalar usynyldy. Barlyq jobalar jármeńkeniń atyna saı. 20-dan asa eń úzdik dep tanylǵan jobalardy QR Tuńǵysh Prezıdenti qory qarjylandyratyn bolady. Ár granttyń somasy 1 mıllıonnan 1,5 mıllıon teńgeni quraıdy», dedi QR Tuńǵysh Prezıdenti qorynyń atqarýshy dırektory Bektas Muhamedjanov. Onyń aıtýynsha, sharanyń maqsaty - qoǵamdy elimizdiń áleýmettik -ekonomıkalyq mańyzy bar máselelerin sheshýge tartý, qoǵamdyq birlestikter men kommertsııalyq emes uıymdardyń áleýmettik bastamalaryna qoldaý kórsetý bolyp tabylady.
Jármeńkege qatysýshy «Alatau IT City» aqparattyq- tehnologııalyq parkin damytý yqpaldastyq qaýymdastyǵynyń prezıdenti Ámiret Qonysbaevtyń pikirinshe, búgingi kúni memleket, bıznes, ǵylym jáne azamattyq qoǵam arasynda ózara árekettestik syndarly qarym-qatynas qajet. "Úkimettik emes uıymdardyń qatysýynsyz parktiń tolyqqandy jáne nyq damýy týraly aıtý qıyn. Bizdiń maqsatymyz -parkti damytýǵa, usynystar berý arqyly zańdyq túrǵyda iske asyrý", dep atap ótti ol.
Jármeńkege qatysýshylar arasynda "Modelıster jáne qurastyrýshylar odaǵy" qoǵamdyq birlestigi de boldy, olar ınnovatsıalyq tehnologııalar ortalyǵyn qurý jáne jastardyń shyǵarmashylyq áleýetin damytý ınstıtýtyn uıymdastyrý jobasyn usynǵan. Atalmysh birlestiktiń prezıdenti Marǵulan Qurmet ózi oılap tapqan tikushaqtyń maketin usyndy. Onyń aıtýynsha, tikushaq beıne baqylaýǵa arnalǵan. "Tikushaqty ásirese, tótenshe jaǵdaılar kezinde qoldanǵan yńǵaıly. Ony óz elimizde jasap shyǵarýǵa bolady. Osyndaı apparat Reseı men Eýropada bar. Meniń apparatymnyń artyqshylyǵy - ony 200 ese arzan baǵaǵa shyǵarýǵa bolady", dep atap ótti ol.
Shara barysynda búgin, sondaı-aq «Ǵylym jáne ınnovatsııalar - Qazaqstannyń ıntellektýaldyq kóshbasshylyǵynyń negizi» taqyrybynda dóńgelek ústel otyrysy bolady.