Almatyda aldaǵy jyldary qandaı nysandar boı kóteredi

ALMATY. QazAqparat – Almatylyqtar jaıly jáne abattandyrylǵan aýdandarda turatyn bolady. Bul týraly Jaıly qalalyq orta basqarmasynyń basshysy Sapar Nurashev málim etti, dep habarlaıdy QazAqparat tilshisi.

Brıfıng barysynda Sapar Nurashev jańa nysandar salý jáne jobalyq-smetalyq qujattama ázirleý josparlary týraly aıtty. Vedomstvo tarapynan 102 joba ázirlenip, onyń 27-si boıynsha saraptama qorytyndysy alynǵan.

«Jas Qanat» shaǵynaýdanynda 6 kóppáterli turǵyn úı, «Nurkent» jáne «Shuǵyla» shaǵynaýdandarynda ınnovatsııalyq shyǵarmashylyq ortalyqtary, sondaı-aq «Zerdeli» shaǵyn aýdanynda 380 oryndy jataqhanasy bar 720 oryndy kásiptik-tehnıkalyq mektep salýdy josparlap otyrmyz. Bulardan ózge, №9, 15, 80, 122, 131, 141 mektepterin, «Bilim-ınnovatsııa» mektebin seısmıkalyq kúsheıtý jáne kúrdeli jóndeý josparlanǵan. Sondaı-aq, «Aqjar» shaǵynaýdanynda 320 oryndyq jáne «Aınabulaq-4», «Saıaly-2» shaǵynaýdandarynda árqaısysy 160 oryndyq úsh balabaqsha salynady», - dedi basqarma basshysy.

Jaıly qalalyq orta basqarmasynyń josparynda №70 bóbekjaı-balabaqsha men Stahanovskıı kóshesindegi balabaqshany seısmıkalyq nyǵaıtý jáne kúrdeli jóndeý jumystary tur.

Spıker 30 kóppáterli turǵyn úı men 18 densaýlyq saqtaý nysanynan turatyn 48 joba qarastyrylyp jatqanyn jetkizdi.

«Kelesi jylǵa biz «Qalqaman-2» TK jobalyq-smetalyq qujattamasyn ázirlep jatyrmyz. Jobaǵa sáıkes osy qala qurylysy torabynda bes qabatty 20 úı salý kózdelgen. 160 oryndyq balabaqshanyń jobasy ázirlenýde», - dedi Sapar Nurashev.

Bolashaqta 2023-2024 jyldary densaýlyq saqtaý salasyn damytý boıynsha birqatar iri jobany iske asyrý josparda. Bul jobalarǵa tórt emdeý mekemesi, úsh emhana, segiz otbasylyq-dárigerlik ambýlatorııa kiredi.

Búginde barlyq joba jobalaý kezeńinde.