Almatyda aqyn O.Súleımenov oqyrmandaryn óziniń jańa shyǵarmalar jınaǵymen tanystyrdy (FOTO)

Almaty. QazAqparat - Búgin Almatyda QR Ulttyq kitaphanasynda Qazaqstannyń halyq jazýshysy, ataqty aqyn, memleket jáne qoǵam qaıratkeri Oljas Súleımenov óz oqyrmandarymen kezdesti.

Aqynnyń 80 jyldyq mereıtoıyna arnalǵan kezdesýge belgili mádenıettanýshy Murat Áýezov, KSRO halyq ártisi Asanáli Áshimov, belgili sáýletshi Shot-Aman Ýálıhanov, ǵalym-ádebıetshi Safar Abdýllo jáne basqa da belgili tulǵalar keldi.

«Bul men úshin úlken qýanyshty kesh. Mundaı kezdesý adamǵa rýhanı kúsh-qýat syılaıdy. Bul Oljas aǵanyń ǵana emes, búkil eldiń, ádebı qaýymnyń merekesi», - dedi M. Áýezov.

Kezdesý barysynda Oljas Súleımenov, Murat Áýezov jáne Asanáli Áshimov úsheýi aqynnyń shyǵarmalary jınaǵy men «Oljas Súleımenov» dep atalatyn ǵylymı-kómekshi bıblıografııalyq kórsetkishtiń tusaýyn kesti.

Shyǵarmalar jınaǵyna aqynnyń qazaq jáne orys tilderinde jaryq kórgen úzdik shyǵarmalary endi.

Al irgeli bıblıografııalyq jumys QR Ulttyq kitaphanasynyń biregeı qory negizinde ázirlengen.

Eń alǵashqy derekkóz 1959 jyly paıda bolǵan. Bul jyly Oljas Súleımenovtyń «Meniń halqym», «Sý» jáne «Dala» óleńderi «Lıteratýrnaıa gazeta» basylymynda jaryq kórgen eken.

Qazirgi tańda derekkózderdiń sany 4 myńǵa jýyqtaıdy.

Olardyń qatarynda aqynnyń shyǵarmalary, ómiri men shyǵarmashylyǵy týraly materıaldar, sondaı-aq, Andreı Voznesenskıı, Robert Rojdestvenskıı, Rımma Kazakova jáne basqa da aqyndardyń Oljas Súleımenovke arnaǵan óleńderi bar.

Bul kitap úsh bólimnen, ıaǵnı qazaq, orys jáne basqa da shet tilderd jazylǵan kórsetkishterden turady. Bıblıografııalyq kórsetkish aqynnyń ómiri men shyǵarmalaryn zerttegisi kelgen fılologtarǵa, ǵylymı qyzmetkerlerge, zertteýshilerge, kitaphanashylarǵa jáne kópshilik oqyrmandarǵa arnalǵan.

Odan basqa, kitaphanada «Oljas álemi» atty akademııalyq kitabı-kórneki kórme jurtshylyq nazaryna usynyldy.