Almatyda «Aqyn» fılminiń tusaýkeseri ótti

ALMATY. QazAqparat - Almatydaǵy Chaplin Mega Alma-Ata kınoteatrynda rejısser Dárejan Ómirbaev túsirgen «Aqyn» fılminiń tusaýkeseri ótti, dep habarlaıdy QazAqparat.

Mádenı is-sharaǵa kınostýdııa basshylyǵy, fılmniń túsirý toby mne BAQ ókilderi qatysty.

Óziniń alǵy sózinde «Qazaqfılm» kınostýdııasynyń prezıdenti Aqan Sataev «Aqyn» fılminiń shyǵarmashylyq tobyn tusaýkesermen quttyqtap, kartınanyń alǵashqy kórsetilimi Tokıodaǵy halyqaralyq kınofestıval sheńberinde ótkenin jáne bul baıqaýda Dárejan Ómirbaev «Úzdik rejısser» júldesimen marapattalǵanyn atap ótti.

Sonymen qatar Aqan Sataev atalǵan kınotýyndy jaqynda ǵana ótken Halyqaralyq Berlın kınofestvaliniń «Forým» baǵdarlamasynda kórsetilgenin eske salyp, fılmniń alar asýlary áli alda ekenin aıtty.

Esterińizge sala ketsek, «Aqyn» fılmi tehnologııalar damyǵan qazirgi zamanda ónerdiń qoǵamda alatyn orny týraly oı qozǵap, poezııaǵa suranys azaıǵan dáýirde aqynnyń kúıinishi týraly syr shertedi. Qazaq halqynyń XIX ǵasyrdaǵy eń kórnekti aqyndarynyń biri Mahambet Ótemisulynyń qıly taǵdyry jaıynda oıǵa batqan basty keıipker názik júrekti aqyndardyń ómiri qashan da qıyn bolǵanyn túsinedi.

- Nemis jazýshysy German Gesseniń «Avtorlyq kesh» atty áńgimesin oqyǵan soń fılmniń stsenarııin jazýǵa kiristim. Keıin qolyma qazaqtyń belgili aqyny Mahambet Ótemisulynyń ómiri men ólimi týraly tyń derektermen tolyqtyrylǵan kitap tústi. Ony oqyp shyǵyp, fılmniń stseanrııine qostym. Osylaısha «Aqyn» fılm dúnıege keldi, - dedi rejısser Dárejan Ómirbaev.

Fılmdegi basty róldi «Jigitter» tobynyń solısi Erdos Qanaev somdady. Belgili ánshi «Jigitter» kvartetine bıyl 20 jyl tolatynyn jáne osy ýaqyt aralyǵynda kórermendermen alǵash ret kınoakter retinde qaýyshyp otyrǵanyn aıtty.

- Basynda bul rólge basqa akter bekitilgen bolatyn. Keıin karantın kezinde kastıng-dırektor Erdos Qanaevtyń kandıdatýrasyn usyndy. Birneshe ret kameraǵa túsirip kórdik te, nátıjesinde Erdosty tańdadyq. Ony ánshi bolǵany úshin tańdaǵanymyz joq. Degenmen keıbir sahnalardy túsirgende onyń shyǵarmashylyqqa jaqyn bolǵany kómek body, - dedi rejısser.

Sonymen qatar Dárejan Ómirbaev «Aqyn» fılmi jaqyn bolashaqta basqa da halyqaralyq bedeldi kınofestıvalder sheńberinde kórsetiletinin habarlady.

Aıta ketsek, fılmniń túsirý jumystary 2020 jyly bastaldy. Negizgi túsirilimder Almaty jáne Almaty oblysynda, sondaı-aq Atyraý oblysynda júrgizildi.

Esterińizge sala ketsek, atalǵan kınotýyndy QR Mádenıet jáne sport mınıstrligi tapsyrysy boıynsha «Ulttyq kınony qoldaý memlekettik ortalyǵy qoldaýymen» Sh.Aımanov atyndaǵy Qazaqfılm» kınostýdııasy túsirgen.