Almatyda aqparattyq tehnologııalar parkinde ekinshi ınnovatsııalyq konvent ótýde
Ol Almaty qalasynyń ǵylymı áleýetin jáne ǵylym men óndiristiń ózara baılanysyn kórsetýge baǵyttalǵan. Konvent kezinde Almaty qalasynyń 2020 jylǵa deıingi ınnovatsııalyq damý jobasy talqylanbaq.
Bul jobany Ál-Farabı atyndaǵy qazaq ulttyq ýnıversıteti jasaǵan. Joǵary oqý ornynyń rektory Ǵalym Mutanovtyń aıtýynsha, Almatynyń ınnovatsııalyq damýda múmkindikteri óte zor. Qalada ǵylymı-zertteý ınstıtýttary men jetekshi joǵary oqý oryndary shoǵyrlanǵan. Jobanyń basty maqsaty - Almatynyń ınnovatsııalyq turǵydan damýy úshin eń ozyq tehnologııalardy engizý. Bul sharaǵa joǵary oqý oryndarynyń basshylary, bıznestik qaýymdastyqtardyń ókilderi, Údemeli ındýstrııalyq-ınnovatsııalyq damý baǵdarlamasynyń aıasynda júzege asyrylatyn jobalardyń bastamashylary men kásiporyn basshylary qatysýda.
Alqaly jıyn kezinde sondaı-aq eń úzdik ınnovatsııalyq joba, eń úzdik jas ǵalym, shetel tehnologııalaryn beıimdeý jáne ınnovatsııalyq kásiporyn atalymdary boıynsha jeńimpazdardy marapattaý rásimi ótedi dep josparlanýda.