Almatyda akademık Rábıǵa Syzdyqtyń kóptomdyq shyǵarmalary tanystyryldy
Ulttyq ǵylym akademııasynyń akademıgi, fılologııa ǵylymynyń doktory, professor, Túrkııa «Dil Kurumu» lıngvıstıkalyq akademııasynyń qurmetti múshesi, Qazaqstan Respýblıkasynyń eńbek sińirgen qaıratkeri, QR Memlekettik syılyǵynyń, Shoqan Ýálıhanov atyndaǵy syılyqtyń, I dárejeli «Barys» ordeniniń ıegeri Rábıǵa Syzdyq bıyl 95 jasqa toldy.
Osy mereıtoıǵa oraı Almatydaǵy Ulttyq kitaphanada ǵalymnyń 14 tomnan turatyn shyǵarmalary tanystyryldy.
Akademıktiń tiltanymdyq eńbekteri – latyn grafıkasyna negizdelgen jańa ulttyq álipbıge kóshý reformasynyń ǵylymı-teorııalyq, ǵylymı-ádistemelik jumystarynyń ózegi, irgetasy. Memleket basshysy Qasym-Jomart Toqaev Qazaqstan halqyna Joldaýynda «qazaq tili ultaralyq qatynas tiline aınalýy» tıistigi týraly aıtyp ótken tapsyrmasynyń oryndalýyna Rábıǵa Syzdyq eńbekteriniń qosar úlesi eleýli.
«Rábıǵa apaı 1970-1980 jyldary ıdeologııa áli qatań, ıaǵnı túrkologııa, til tarıhymen shuǵyldanýǵa bolmaıtyn kezde Baıtursynovtanýdyń, Abaıtanýdyń negizin qalady. Abaıtanýdyń úlken sózdigin shyǵardy. Qoja Ahmet ıAsaýı jóninde de irgeli eńbekter jazyp, ıAsaýıtanýdyń negizin sonaý 1980 jyldary qalady. Ol kezde dinge tyıym salynǵan tus bolatyn. 14 tomnan turatyn eńbegin jınaq etip shyǵarý jumysy birneshe jyl buryn bastalǵan edi. Aldaǵy ýaqytta basqa da eńbekteri shetinen qosyla beredi. Ár ǵalymnyń qoljazbalary, ár kezde jazǵan eńbekteri kóp. Degenmen, eńbekteriniń basym kópshiligi osy tańdamaly jınaqqa enip otyr. Rábıǵa apaıymyz qazir úlken arystarymyzdyń kózi bolyp esepteledi. Ony ana tilimizdiń – anasy dep aıtamyz», - deıdi A. Baıtursynuly atyndaǵy Til bilimi ınstıtýtynyń dırektory Erden Qajybek.
Shara QR Bilim jáne ǵylym mınıstrliginiń Ǵylym komıteti jáne A.Baıtursynuly atyndaǵy Til bilimi ınstıtýtynyń uıymdastyrýymen ótti.