Almatyda Ahmet Jubanovtyń 115 jyldyǵyna arnalǵan onlaın kontsert ótýde

ALMATY. QazAqparat - Almatyda halyq mýzykalyq aspaptar mýzeıinde akademık, ónertaný ǵylymynyń doktory, professor, dırıjer Ahmet Jubanovtyń 115 jyldyǵyna oraı onlaın kontsert ótip jatyr, dep habarlaıdy QazAqparat tilshisi.

Shara Yqylas atyndaǵy halyq mýzykalyq aspaptar mýzeıiniń áleýmetik jelilerinde onlaın formatta ótip jatyr.

Baǵdarlamada mýzeı qorynda saqtalǵan Ahmet Jubanovtyń dombyrasy týraly taqyryptyq dáris bar.

Ǵalymnyń túpnusqa dombyrasynda kúıshi Ásel Alına «Bı» kúıin oryndap berdi.

Aıta keteıik, búgin halyq murasynyń janashyry, kompozıtor Ahmet Jubanovtyń týǵanyna 115 jyl.

Qazaqtyń tuńǵysh kásibı mýzykanty, mýzyka zertteýshisi, ulaǵatty ustaz, belgili dırıjer, kásibı kompozıtor, Qazaqstan Ǵylym akademııasynyń óner salasyndaǵy akademıgi, Qazaqstannyń halyq ártisi Ahmet Qýanuly Jubanov óner kógindegi jaryq juldyzdardyń biri.

Qazaq ónerine ózindik úles qosyp, ónerimiz ben mádenıetimizdiń órkendeýine kúsh-jiger jumsaǵan halqymyzdyń birtýar daryndy uly - Ahmet Qýanuly Jubanovtyń ónegeli de ómirsheń eńbegi ǵasyrlar qoınaýynda úlken qazyna bolyp saqtalatyn baǵa jetpes qundy dúnıe.