Almatyda aǵash sheberhanasyndaǵy órt teplovızorlardyń kómegimen sóndirildi

ALMATY. QazAqparat - Almatyda aǵash buıymdary men aǵash materıaldary janyp jatqan qoımadaǵy órt teplovızorlardyń kómegimen sóndirildi, dep habarlaıdy QazAqparat tilshisi.

7 qarasha kúni saǵat 01:21-de Almaty qalasy Tótenshe jaǵdaılar qyzmetiniń órt sóndirý bólimsheleriniń 15 tehnıkasy, jeke quramnyń 50-den astam adamy Aısha bıbi, 387a mekenjaıyndaǵy órtke baılanysty shaqyrtýǵa attandy.

«Alty mınýttan keıin kelgen birinshi órt sóndirý brıgadasy aǵash óńdeý tsehynda órt shyqqanyn anyqtady.

Ǵımarattyń ústińgi beton jabyny men jylý oqshaýlaǵysh materıal retinde kúlmen toltyrylǵan aspaly tóbeniń arasynda qýystar bolǵan. Saldarynan órt tóbeniń keńistiginen ótip, kúl qaldyqtaryna taraı bastady. Jalynnyń qurǵaq aǵash materıaldar jınalǵan jaılarǵa taralý qaýpi týyndady.

Tilsiz jaýdy aýyzdyqtaý úshin órt sóndirýshiler jasyryn janý kózderin anyqtaý úshin teplovızorlar paıdalandy», - dep habarlady TJD.