Almatyda «Ádil saılaý úshin» shtaby saılaýshylarǵa kómek kórsetýdi jalǵastyryp jatyr

ALMATY. QazAqparat - «Ádil saılaý úshin» qalalyq shtabynyń jetekshisi Baýyrjan Maqulbaev qozǵalys músheleri elimizdiń barlyq óńirlerinde belsendi jumys istep, saılaýshylarǵa quqyqtyq kómek kórsetip jatqanyn aıtty, dep habarlaıdy QazAqparat tilshisi.

Onyń aıtýynsha, Qazaqstannyń barlyq qalalarynda Prezıdent saılaýyn quqyqtyq qamtamasyz etý úshin «Ádil saılaý úshin» qozǵalysynyń fılıaldary ashylǵan.
«Qozǵalys músheleri barlyq buqaralyq aqparat quraldaryn qamtydy, áleýmettik jelilerde belsendilik tanytyp, qazaqstandyqtardyń suraqtaryna jaýap berdi. Túsindirý jumystaryn júrgizip, saılaý zańnamasyn túsindirip, eńbek ujymdarymen kezdesýler ótkizip jatyr», - dedi Baýyrjan Maqulbaev.
Spıkerdiń sózinshe, zańgerler saılaýǵa alǵash ret qatysqaly otyrǵan stýdent jastarǵa erekshe kóńil bóldi.
«Qozǵalystyń negizgi mindeti – zań qoǵamdastyǵynyń saılaý naýqany barysyna quqyqtyq baqylaý jasaý jáne saılaý protsesine qatysýshylarǵa saılaý zańnamasyn qoldaný tártibin túsindirý. Shtabqa Qazaqstandaǵy jáne sheteldegi tanymal zańgerler kirdi»,- dedi ol.
Eske salaıyq, qazan aıynda Almatyda «Ádil saılaý úshin» qozǵalysy qurylǵan bolatyn.