Almatyda ádebıet pen óner qaıratkerlerine memlekettik stıpendııalar tabystaldy
Mádenıet salasyndaǵy memlekettik stıpendııalar jyl saıyn Memleket basshysynyń Jarlyǵymen eldiń mádenı salasyn saqtaýǵa jáne damytýǵa úles qosqan shyǵarmashyl qyzmetkerlerdi qoldaý maqsatynda beriledi.
Mádenıet jáne sport mınıstrliginiń aqparatyna súıensek, bıyl memlekettik stıpendııa ádebıet pen ónerdiń 74 qaıratkerine taǵaıyndaldy. Olardyń qatarynda Oljas Súleımenov, Dýlat Isabekov, Sofy Smataev, Asanáli Áshimov, Aqushtap Baqtygereeva, Myrzataı Joldasbekov, Sábıt Dosanov, Bıbigúl Tólegenova, ıÝrıı Pomerantsev, Doshan Joljaqsynov jáne t.b. maıtalmandar bar. Sonymen qatar, Rýhııa Baıdúkenova, Beıbit Sarybaı, Saıda Qalyqova, Erjan Maksım, Naýryz Ernat, Temirlan Oljabaı sekildi jas daryndarǵa memlekettik qoldaý kórsetildi.
Mınıstr Dáýren Abaev saltanatty rásimdi asha otyryp, marapat ıelerin shyn júrekten quttyqtap, Memlekettik stıpendııalardy tapsyrý olardyń otandyq mádenıetti damytýǵa qosqan eleýli úlesin moıyndaý ekenin atap ótti. Sondaı-aq, ol búgingi tańda qoǵamda, ásirese jastar arasynda konstrýktıvti rýhanı qundylyqtardy ilgeriletý isinde shyǵarmashylyq ıntellıgentsııanyń róli artyp kele jatqanyn jetkizdi.
Sonymen qatar, mınıstr bıyl elimiz Ahmet Baıtursynulynyń 150 jyldyǵy, Muhtar Áýezovtyń 125 jyldyǵy, Ázilhan Nurshaıyqov pen Roza Baǵlanovanyń 100 jyldyq mereıtoılaryn atap ótetindigin aıtty.
Kezdesý sońynda Dáýren Abaev rásimge qatysýshylarǵa myqty densaýlyq, shyǵarmashylyq tabys jáne otbasylyq baqyt tiledi.