Almatyda Abaı dańǵylyn uzartý úshin 63 jer ýchaskesi satyp alynady

ALMATY. QazAqparat - Abaı dańǵylyn uzartý jumystary jyl sońyna deıin aıaqtalady. Bul týraly Naýryzbaı aýdany turǵyndarymen kezdesý barysynda qala basshysy Erbolat Dosaev aıtty, dep habarlaıdy QazAqparat tilshisi.

Naýryzbaı aýdany turǵyndarynyń biri qala ákiminen Abaı dańǵylyn uzartý úshin qalǵan saıajaılar qashan súriletinin surady.

Erbolat Dosaev 63 jer telimin satyp alý qajettigin, onyń 53-i qazirdiń ózinde memleket menshiginde ekenin aıtty.

Qalǵan 10 jer teliminiń ekeýi muragerlik quqyqqa baılanysty túzetilip jatsa, tórt joba sotqa ótken.

Aıtýynsha, atalǵan máseleler mamyr aıynyń sońyna deıin sheshilýi tıis.

«Baǵalaý eskirgen, biz ony jańartýǵa májbúrmiz, óıtkeni tólem jasaý kezinde jańadan baǵalaý kerek. Satyp alý jóninde suraqtar jınalyp qaldy. Jer qatynastary basqarmasyna muny mamyr aıynyń sońyna deıin retteýdi tapsyrdym. Biz bul jumysty byltyr jasaýymyz kerek edi, aqsha boldy. Kelisimshart jasasyp, satyp alǵannan keıin jumysqa kirisemiz», – dep túsindirdi Erbolat Dosaev.

Eske salaıyq, osy jyldyń aqpan aıynda shahar basshysy Abaı dańǵylyn qala shekarasyna deıin uzartý jumystary 2023 jyldyń sońyna deıin aıaqtalatynyn aıtqan edi.