Almatyda AÁK-ti zańsyz alǵandar 3,4 mln teńgeni memleketke qaıtardy

ALMATY. QazAqparat – Almaty qalalyq Áleýmettik ál-aýqat basqarmasy basshysynyń orynbasary Danııar Álkebaıuly ataýly áleýmettik kómekti zańsyz alǵan otbasylar aqshany memleketke qaıtyryp jatqanyn jetkizdi, dep habarlaıdy QazAqparat tilshisi.

«AÁK alatyndarǵa tamyz-qyrkúıek aılary tolyq tólendi. Oǵan kepildik bere alamyn. Búgingi tańda áleýmettik kómekti zańsyz alǵandar aqshany memleketke qaıtaryp jatyr. Naqtyraq aıtsam, 3,4 mıllıon teńge keri qaıtaryldy. Bastapqyda eskertý jasaımyz, adamdarǵa kiristerin jasyrǵandyqtaryn aıtyp, zańsyz alǵan aqshany memleketke qaıtaryp berýi tıistigin túsindiremiz. Sodan keıin sanaımyz, somasyn aıtamyz. Óz erkimen qaıtarǵandarǵa túbirtek beriledi. Eger bul óz erkimen jasalmasa, onda barlyq materıaldar sotqa jiberiledi», - dedi ol.

Búgin ótken brıfıngte aıtylǵan málimetterge súıensek, Almatyda 11 myńnan astam otbasyǵa AÁK taǵaıyndalǵan. Alaıda, qaıta tekserýdiń nátıjesi boıynsha 634 januıaǵa tólemder toqtatyldy. Sebebi, olardyń turmystyq jaǵdaıy kedeılik sheginen asyp ketken.

«Sonymen qatar, qalada turmaıtyn balalardy anyqtadyq. Bilim mınıstrliginiń habarlaýynsha, olar elimizdiń basqa aımaqtarynda bilim alýda. Sondyqtan biz Qazaqstannyń ózge oblystarynda bilim alatyn 597 balaǵa tólemaqyny toqtattyq. Sondaı-aq, AÁK alatyn jeke kásipkerlermen de jumys júrgizildi. Olardyń ishinde 186 jeke kásipkerdiń tabysyn eskere otyryp, AÁK tóleýdi toqtattyq», - dep atap ótti Danııar Álkebaıuly.

Buǵan deıin, ol AÁK tóleýdiń jańa tetikteri týraly aıtqan bolatyn.