Almatyda A-Parking isi boıynsha sot úkimi shyqty

ALMATY. QazAqparat – Búgin Almatynyń Almaly aýdandyq soty «Almaty spetstehparkıng servıs» JShS burynǵy dırektory Marat Pirinbekov pen Alan Parking JShS burynǵy bas dırektory Muhtar Bazarbaevqa úkim shyǵardy, dep habarlaıdy QazAqparat tilshisi..

Sotta anyqtalǵandaı, sottalýshy P. «A» JShS dırektory bola tura, jaýapker B-men aldyn ala sóz baılasyp, bir top adammen birge 225 630 072 teńge («P» JShS shotyna avtoturaq aqysynan túsken) qarjyny jymqyrǵan.

Budan bólek sottalýshy B. «A» JShS bas dırektory bola tura, izdeýde júrgen adammen aldyn ala kelisip, bir top adammen avtoturaqtan jınalǵan 190 078 778 teńge somasynda asa iri kólemdegi aqshany urlaǵan.

Sottalýshylardyń qylmystyq áreketinen memleketke jalpy somasy 436 040 706 teńge bolatyn, qos kompanııanyń paıdasynyń 30% mólsherinde dıvıdend túspegen.

«Sottalýshy B. basqa adamdarmen toptasyp, urlyq jasaǵannan keıin 391 651 076 teńge urlanǵan qarajattyń bir bóligin jalǵan mámile jasap, zańdastyrý arqyly zańdy aınalymǵa túsirgen» dep habarlady Almaty qalasy sotynyń baspasóz qyzmeti.

Qylmystyq isti qaraý barysynda memleketke kelgen zııan tolyq kólemde óteldi.

Sottalýshylardyń kinási ekonomıkalyq saraptamamen, aýdıtorlyq qorytyndymen, kýálardyń aıǵaqtarymen jáne istiń basqa materıaldarymen dáleldendi.

Aıta ketsek, sotta aıyptalýshylar aqyly avtomattandyrylǵan avtoturaq engizý jobasynyń memleketke tıimdi ekenin kórsetip, kinásin moıyndamady.

Olardyń aıtýynsha, memleket óz tarapynan bul jobaǵa aqsha salmaı, salyq aıyppuldary men dıvıdend túrindegi jeńildikterge ıe bolǵan.

Prokýror sottan aıyptalýshylardy 8 jylǵa bas bostandyǵynan aıyrýdy surady.

«Úkim taǵaıyndaý kezinde sot jazany jeńildetetin mán-jaılardy, buryn sottylyǵynyń bolmaýyn jáne memleketke keltirilgen zııandy tolyq kólemde óteıtinin eskerdi, sotqa deıingi tergeý organdary aýyrlatatyn mán-jaılardy anyqtaǵan joq»,- delingen habarlamada.

Qylmysqa qatysýshylardyń árqaısysynyń qylmystyq rólin, jeńildetetin mán-jaıdy eskere otyryp, sot Pirinbekovti 5 jylǵa, Bazarbaevty 6 jyl 6 aıǵa bas bostandyǵynan aıyrýǵa, jazasyn qylmystyq-atqarý júıesiniń qaýipsizdigi ortasha mekemelerinde óteýge úkim etti.

Sot úkimi zańdy kúshine engen joq.

Eske salaıyq,14 sáýir kúni «Alan Parking» JShS dırektory Muhtar Bazarbaev eki aıǵa qamaýǵa alynǵan bolatyn.

Keıin aqyly avtoturaqtar qalanyń menshigine qaıtaryldy.