Almatyda 95 jataqhananyń 20-nan kemshilikter tabyldy – monıtorıngilik top
Jastar saıasatyn damytý memlekettik qorynyń dırektory Ǵazız Qajdenbekovtiń aıtýynsha, 11-16 tamyz aralyǵynda ótken alǵashqy monıtorıng barysynda 95 jataqhananyń 20-nan kemshilikter anyqtalǵan.
«Atap aıtqanda, órt qaýipsizdigi, jóndeý jumystarynyń áli aıaqtalmaýy, sanepıd normalarynyń talapqa saı kelmeýi, stýdentterdiń jataqhanaǵa retsiz ornalasýy syndy kemshilikter tabyldy. Biz olardy jazyp, túzetý kerektigi jóninde JOO-larǵa eskertip ketkenbiz. Tamyz aıynda qala ákimi Erbolat Dosaev 5 qyrkúıekten keıin qaıta monıtorıng jasaý týraly tapsyrma bergen bolatyn. Osyǵan baılanysty ekinshi monıtorıng jumystaryn bastadyq. Bizdiń toptyń quramynda máslıhat depýtattary, qoǵam jáne BAQ ókilderi, jastar, jıyny 51 adam bar», - dedi ol.
Ǵ. Qajdenbekov sondaı-aq búginde Almatydaǵy 95 jataqhanaǵa 30 myń stýdent ornalastyrylǵanyn atap ótti.
«Ótken jyly Almatyǵa ózge óńirlerden 112 myń stýdent kelse, bıyl 120 myń stýdent keldi. Sondaı-aq qazirgi ýaqytta tek 30 myń stýdent qana qaladaǵy 95 jataqhanamen qamtylǵan», - dedi spıker.
Ol stýdentterdiń Almatyda jataqhanadan oryn tappaı, qańǵyryp, kóshede jatyp júr deýge negiz joq ekenin aıtty.
«Biz jaqynda túngi ýaqytta kóshege shyǵyp, vokzal, avtovokzal, taǵy basqa qoǵamdyq oryndardy aralap tekserdik. Ol jerlerge qonyp júrgen birde-bir stýdentti kórgen joqpyz», - dedi spıker.
Onyń aıtýynsha, Almatydaǵy hostelderde turýdyń ortasha baǵasy búginde shamamen 50 myń teńge bolsa, jataqhanalardyń ortasha baǵasy 35-50 myń teńgeniń arasynda.
Sonymen qatar Ǵazız Qajdenbekov Jastar saıasaty basqarmasynyń Facebook-paraqshasynda árbir JOO stýdentteriniń jataqhanaǵa ornalasýyna baılanysty jaýapty mamannyń baılanys nomerleri jarııalanǵanyn jetkizdi.
«Eger jataqhanaǵa tura almaǵan stýdentter bolsa, osy mamandarǵa habarlasa alady», - dedi ol.
Aıta keteıik, monıtorıngilik top búgin ekinshi tekseris jumysyn aıaqtap, Almatydaǵy 36 JOO men 95 jataqhanany aralap shyqty.
Jastar saıasatyn damytý memlekettik qorynyń baspasóz qyzmetiniń málimetine sáıkes, monıtorıng qorytyndysy boıynsha JOO-lardyń kópshiligi ákimdiktiń eskertý-usynystaryn eskerip, aldyńǵy monıtorıng kezinde anyqtalǵan kemshilikterdi joıǵan.
Foto: gadgetshelp.com