Almatyda 84 jańa ǵımarat kommýnaldyq menshikke berildi
Onyń aıtýynsha, memleket menshigine berilgen nysandar arasynda mektepter, kópqabatty úıler, dene shynyqtyrý-saýyqtyrý keshenderi bar.
«1 qarashadaǵy jaǵdaı boıynsha qalanyń kommýnaldyq menshigine jańadan salynǵan 84 jyljymaıtyn múlik nysany qabyldandy. Onyń arasynda jańa salynǵan 18 bilim berý nysany (onyń ishinde mektepterge jalǵanyp salynǵan 14 japsarlas qurylys); 63 kóppáterli turǵyn úı jáne 3 dene shynyqtyrý-saýyqtyrý kesheni bar»,- dedi ol.
Sonymen qatar, 99 jyljymaıtyn múlik obektisi respýblıkalyq menshikten kommýnaldyq menshikke berildi.
«Respýblıkalyq menshikten kommýnaldyq menshikke 99 jyljymaıtyn múlik nysany, bul - 88 páter jáne meken jaı boıynsha 11 jyljymaıtyn múlik nysany qabyldandy. 7 syıǵa tartý sharty boıynsha 1 páter, 2 ǵımarat, 3 fýtbol túrindegi angar jáne baǵdarlamalyq ónim qabyldandy», - dep atap ótti Almaty qalasynyń memlekettik aktıvter basqarmasynyń basshysy.
Sondaı-aq brıfıngte 2022 jyldyń 1 qańtarynan 1 qarashasyna deıin Almaty qalasy ákimdiginiń qaýlysyna sáıkes jańadan salynǵan 32 ınjenerlik nysan qalanyń kommýnaldyq menshigine qabyldanǵany belgili boldy.
«Bul tizimde sý jáne káriz jelileri, qurylys jáne avtokólik joldaryn rekonstrýktsııalaý nysandary, syrtqy jaryqtandyrý, telefon jelileri men jol belgileri, jylý jelileri, saıabaq múlki jáne taǵy basqalary bar»,- dedi spıker.
Abzal Egemberdıevtiń aıtýynsha, 2019 jyldyń 1 mamyrynan bastap Almaty qalasy boıynsha memlekettik satyp alýdyń jalǵyz uıymdastyrýshysy bolyp qalalyq memlekettik aktıvter basqarmasy taǵaıyndaldy.
«2022 jyldyń 10 aıynda jalpy somasy 254,6 mlrd teńgege 397 konkýrs jarııalandy. Satyp alýdan túsken únemdeý 7,8 mlrd teńge boldy»,- dep atap ótti ol.