Almatyda 800 bala sportpen tegin aınalysyp júr

ALMATY. QazAqparat - Almatyda az qamtylǵan otbasylardyń 6-17 jas aralyǵyndaǵy balalaryna arnalǵan tegin áleýmettik joba jumys istep tur. Onyń aıasynda 800 bala sportpen aınalysyp jatyr. Bul týraly búgin  Óńirlik kommýnıkatsııalar qyzmeti alańynda «Batyl bol» baǵdarlamasynyń uıymdastyrýshysy Muhtar Tursynov aıtty, dep habarlaıdy QazAqparat tilshisi.

Muhtar Tursynovtyń sózine súıensek, Elbasynyń bıylǵy Joldaýynda aıtylǵan buqaralyq sport jáne dene shynyqtyrýdy damytý máselesi ult saýlyǵyn qamtamasyz etedi.

«Elbasy bıylǵy Joldaýynda halyqtyń densaýlyǵy men salaýatty ómir salty týraly birshama jaqsy oı aıtty. Dene shynyqtyrý men buqaralyq sportty damytý - salaýatty ómir saltyn qalyptastyrýdyń negizgi sharty. Ásirese, búgingi kúnniń óte ózekti máseleleriniń biri - ult saýlyǵy máselesin sheshýdiń naqty qadamdary men joldary kórsetilgen.

«Shynymen de, eger biz olımpıada chempıondaryn tárbıelegimiz kelse, birinshi kezekte jergilikti bılik organdary buqaralyq sportty jan-jaqty damytýǵa kóńil bólýi tıis», - dedi Muhtar Tursynov.

Onyń aıtýynsha, «Batyl bol» áleýmettik jobasy bıyl naýryzda Naýryzbaı aýdany ákimdiginiń qoldaýymen bastalǵan.

Budan basqa, joba jeke kásipkerlik pen áleýmettik áriptestiktiń dene shynyqtyrý jáne sporttyq nysandaryn qoldaý jáne damytýǵa baǵyttalǵan.

«Jobanyń maqsaty - balalar men jasóspirimderdi sportqa tartý. Qazirgi kezde 800-den astam bala qatysyp júr. Joba bıyl 31 jeltoqsanǵa deıin jumys isteıdi. Jobaǵa qatysý kezinde balalar tegin bilim alady jáne 10 aılyq zertteý nátıjesi boıynsha sportta shyńdalyp, óz bolashaǵyn jasaı alady. Joba sporttyń 4 túri - shahmat, toǵyzqumalaq, qazaq kúresi jáne boks sektsııalary boıynsha jumys istep tur. Barlyq sport túrleri táýligine 1,5 saǵattan, aptasyna úsh ret ótkiziledi. Balalardyń sportqa degen qyzyǵýshylyǵyn arttyrý maqsatynda jattyqtyrýshylar olardy Almaty jáne basqa qalalarda jarystarǵa daıyndap jatyr», - dedi Muhtar Tursynov.