Almatyda 8 myńnan astam oqýshy mektep avtobýstary arqyly qatynap júr

ALMATY. QazAqparat – Almatyda «Mektep avtobýsy» jobasy aıasynda kún saıyn 8 myńnan astam oqýshy mektepke qatynaı alady, dep habarlaıdy QazAqparat tilshisi.

Almatyda jańa oqý jyly bastalǵaly beri 100 jańa mektep avtobýsy júrip jatyr. Almaty ákimdiginiń málimetinshe, avtobýstar qaladaǵy 30 mektepke kúnine 8258 oqýshyny tasymaldaıdy.

«Mektep avtobýsy» pılottyq jobasy Almaty qalasynyń ákimi Erbolat Dosaevtyń tapsyrmasymen júzege asyryldy jáne Qazaqstandaǵy mundaı aýqymdy jobanyń alǵashqysy. Jobany júzege asyrý aıasynda «AlmatyElektrotrans» JShS Almaty qalasy bilim basqarmasynyń kómegimen 100 mektep avtobýsyn (onyń ishinde 21 oryndyq 50 avtobýs jáne 40 oryndyq 50 avtobýs) satyp aldy. Avtobýstar kishkentaı jáne mektepten shalǵaı turatyn oqýshylardy tasymaldaıdy», - dep habarlady Almaty ákimdiginiń baspasóz qyzmeti.

Mysaly, №210 mektep-lıtseıine «Baıbesik» shaǵyn aýdanynan 222 bala, «Uljan-2» shaǵyn aýdanynan 148 bala tasymaldanady. №200 mektep-gımnazııasyna Abaı saıajaıynan 241 oqýshyny tasymaldaıdy. №162 mektep-gımnazııasyna «Jas Qanat» shaǵynaýdanynan 175 bala, al №183 jalpy bilim beretin mektepke «Asqartaý» shaǵynaýdanynan mektep avtobýsy 76 oqýshyny alyp keledi. Mektep avtobýstary barlyq halyqaralyq qaýipsizdik standarttary men tehnıkalyq talaptarǵa sáıkes keledi: apattyq shyǵý, qaýipsizdik beldikteri, múmkindigi shekteýli balalarǵa arnalǵan pandýs, órt qaýipsizdigi júıesi bar.

Almaty qalasy ákiminiń orynbasary Ásem Núsipovanyń aıtýynsha, ár mektep boıynsha marshrýttyq paraqtar ázirlendi. Bul mektepke deıin jetkizýdi qajet etetin barlyq balany qamtý úshin jasalady.

«Búgingi tańda balalardy otyrǵyzyp, túsirýge arnalǵan arnaıy aıaldamalar bar. Sol baǵyt boıynsha oqýshylarmen birge arnaıy muǵalimder de erip júredi. Jobany ary qaraı damytý kezinde onymen 12500 bala qamtylatyn bolady. Bizdiń esebimizshe 1-11 synyp oqýshylary arasynda osynsha bala sanyna mektepke qatynaý úshin mektep avtobýstary qajet»,-dedi ol.

Almaty qalasy bilim basqarmasynyń basshysy Lázzat Jylqybaeva 30 mekteptiń barlyǵynda oqýshylardy tasymaldaýǵa kelisim-shart jasalǵan. Bul úshin bıýdjetten 1,4 mlrd teńge qarastyrylǵanyn aıtty.

«1 qyrkúıekten bastap barlyq avtobýs tıisti qaýipsizdik sharalaryn saqtaı otyryp, bekitilgen marshrýttar boıynsha balalardy tasymaldaıdy. «Mektep avtobýsy» jobasyn júzege asyrý oqýshylardyń qaýipsizdigin qamtamasyz etedi», - dedi Lázzat Jylqybaeva.

Aıta keteıik, Almatyda «Mektep avtobýsy» jobasynyń ekinshi kezeńin iske asyrý úshin qalalyq mobıldilik basqarmasy 2024 jyly qosymsha 50 avtobýs satyp alýdy josparlap otyr.