Almatyda 8 kóldegi sý deńgeıin tómendetý jumystary bastaldy
«Almaty mańynda 45 morenalyq jáne muzdyq kól ornalasqan, olardyń ishinde asa qaýiptisi – 12. Almaty qalasynyń aýmaǵynda selmen kúresýdiń eń tıimdi ádisi - morenalyq kólderdi bosatý boıynsha aldyn alý jumystaryn júrgizý. Bıyl Aqsaı, Úlken jáne Kishi Almaty ózenderiniń basseınderindegi 8 kóldi bosatý jumystary bastaldy»,-delingen habarlamada.
Qazirgi ýaqytta 8 kólde jumysqa 90 adam kirisýge daıyn. Býldozerler iske qosylady, evakýatsııalyq arnalardy tazartý jáne tereńdetý, sıfon qubyrlaryn ornatý jáne montajdaý, sondaı-aq sorǵy qondyrǵylaryn iske qosý boıynsha jumystar júrgizý josparda.
Osy maqsatta ónimdiligi joǵary 9 dana sorǵy, 2000 metr polıetılen qubyrlary daıyndaldy, olar 2019 jyly Almaty qalasy ákimdiginiń qoldaýymen satyp alyndy.
«Morenalyq kólderdiń jaı-kúıine baqylaý júrgizý úshin turaqty negizde jumys isteıtin 9 beketke qosymsha – 12 bıik taýly maýsymdyq beketter qoıylǵan. Sel qaýpi bar kezeńde barlyǵy 21 beket jumys isteıtin bolady. Aıta ketý kerek, 2020 jyly 7 morenalyq kólde aǵyzý kanaldary arqyly, olardy tazartý jáne tereńdetý jolymen, sondaı-aq sıfon qubyrlarynan – 5,2 mln.m3 sý tartyp shyǵaryldy»,-dep atap ótti vedomstvadan.
Álemdik tájirıbeni eskere otyryp, «Tsıfrlyq Qazaqstan» memlekettik baǵdarlamasy sheńberinde jáne «Smart-city» bazasynda ákimdiktiń qoldaýymen Kishi jáne Úlken Almaty, Qarǵaly jáne Aqsaı ózenderiniń basseınderinde sel qaýpiniń avtomattandyrylǵan monıtorıngi júıesin engizý boıynsha jumystar júrgizilýde.
2019 jyly birinshi kezeńdi iske asyrý sheńberinde Kishi jáne Úlken Almaty ózenderi basseınderiniń morenalyq kólderinde, bógetterinde, sel oshaqtarynda jáne ózen arnalarynda 10 stantsııa salyndy, sondaı-aq «Qazseldenqorǵaý» AQPTB MM jáne Almaty qalasynyń TJD baǵdarlamalyq qamtamasyz etý ázirlendi jáne dıspetcherlik oryndar quryldy.
«Bıyl qalǵan 21 stantsııanyń qurylysyn aıaqtaý josparda. Qaladaǵy sel qaýpiniń avtomattandyrylǵan monıtorıng júıesi naqty ýaqyt rejıminde gıdrometeorologııalyq jaǵdaıdy, morenalyq kólderdi baqylaýdy qashyqtyqtan qamtamasyz etýge múmkindik beredi. Almaty qalasyndaǵy sel jaǵdaıy erekshe baqylaýda», - delingen habarlamada.