Almatyda 8 qarjy pıramıdasynyń qyzmeti toqtatyldy

ALMATY. QazAqparat- 2022 jyly megapolıste 8 qarjy pıramıdasynyń qyzmeti toqtatyldy. Bul týraly óńirlik kommýnıkatsııalar qyzmetinde ótken baspasóz máslıhatynda Almaty qalasy ekonomıkalyq tergeý departamentiniń ókili Jaqsylyq Myrzahan málim etti, dep habarlaıdy QazAqparat tilshisi.

Spıkerdiń sózinshe, byltyr Almaty qalasy boıynsha ekonomıkalyq tergep-tekserý departamenti qala aýmaǵyndaǵy 8 qarjy pıramıdasynyń qyzmetin toqtatty.

Olar - «Innova Gold», «QOZGAN», «The Finiko», «Grand lux house», «Tender», «Alfa Seıls Konsaltıng», «Forex klýb», «Rich Beach».

QR Qylmystyq kodeksiniń 217-babymen qarjy pıramıdasy boıynsha qozǵalǵan 6 qylmystyq is sotqa joldandy: «Caspian Crocus», «TheFiniko», «World Business Consulting» - 2, «Qozgan Inc», «B2B Jewelry».

Joǵaryda atalǵan qarjy pıramıdalarynan 3500-den astam azamat zardap shekti.

«Máselen, «Qozgan Inc» qarjy pıramıdasyn uıymdastyrýshylarǵa qatysty sotqa deıingi tergeýdi aıaqtaldy. Uıymdastyrýshylar azamattarǵa ózderiniń aqshalaı qarajattaryn tenderlik jobalarǵa salýdy usyndy, bul 105 kún ishinde salym somasynyń 5-30 paıyzǵa deıin eselep qaıtarýǵa bolady dep sendirgen. Salymshylardyń jalpy sany 50-den astam adamdy quraıdy, keltirilgen zalal somasy 270 mln teńgeden asty»,- dedi Almaty qalasy ekonomıkalyq tergeý departamentiniń ókili Jaqsylyq Myrzahan.

Sondaı-aq, quramynda altyn elementteri bar altyn quımalary men kosmetıkalyq ónimderdi satatyn ınternet-dúken retinde jasyrynǵan «Innova Gold» ınvestıtsııalyq pıramıdasyn uıymdastyrýshyǵa qatysty sotqa deıingi is tergelip jatyr.

«Innova Gold» uıymdastyrýshylary azamattardyń senimine kirip, jobaǵa shaqyrǵan. Qarajat salǵany úshin bonýstar esepteýge, sondaı-aq eger klıent ózimen birge basqa salymshylardy alyp kelgen bolsa, jobadaǵy rólin ilgeriletýge ýáde bergen. Azamattar salǵan aqshalaı qarajaty «Innova Gold» saıtyndaǵy salymshynyń jeke kabınetinde kórsetildi, alaıda saıt paıdalanýshylary óz qarajatyn is júzinde qolma-qol aqshaǵa aınaldyra almady»,- dedi ol.

Jaqsylyq Myrzahannyń aıtýynsha, ekonomıkalyq tergeý qyzmeti qabyldanǵan sharalardyń nátıjesinde qarjy pıramıdasyn uıymdastyrýshylardyń bank shotyna, jyljymaly jáne jyljymaıtyn múlkine tyıym salyndy.

Mysaly, «World Business Consulting» qarjy pıramıdasyn uıymdastyrýshylarǵa qatysty qylmystyq is boıynsha segiz jábirlenýshige kelgen 34, 2 mln teńge zalal óteldi.

Buǵan deıin «B2B Jewerly» qarjy pıramıdasyn uıymdastyrýshylarǵa qatysty qylmystyq is boıynsha 230-dan astam jábirlenýshige 300 mln teńge zalal ótelgenin jazǵan bolatynbyz.