Almatyda 78 atys qarýy jasyrylǵan oryn tabyldy
Polıtsııa men Almaty qalasy boıynsha UQKD qyzmetkerleri júrgizgen is-shara barysynda qylmystyq toptyń bes múshesi ustalyp, qamaýǵa alyndy. Olardyń aýyr jáne asa aýyr qylmystar jasaǵany belgili boldy.
«Keshendi jedel jáne arnaıy is-sharalar barysynda olardyń Almaty oblysy aýmaǵynda birneshe qarýdy jasyrǵany anyqtaldy. Nátıjesinde eki «Kalashnıkov» avtomaty (AKS), «Makarov» jáne «TT» júıeleriniń eki jaýyngerlik tapanshasy, úsh ańshylyq karabın, eki tegis uńǵyly vınchester, 13 kesilgen ańshy myltyǵy, 53 ańshy myltyǵy, úsh travmatıkalyq tapansha, sondaı-aq, ártúrli atys qarýyna arnalǵan 200-den astam oq-dári tabyldy. Sonymen qatar uıymdasqan qylmystyq top múshelerinen eki jaýyngerlik jáne tórt jaryq shýly granata, tórt pyshaq, eki portatıvti radıostantsııa, sondaı-aq, ártúrli arnaıy quraldar – optıkalyq kózdeýishter, oq ótkizbeıtin jıde, taıaqsha jáne t.b. tárkilendi. Sońǵy qarý-jaraq jasyrylǵan oryndy keshe ǵana anyqtadyq», – dedi Almaty qalalyq Polıtsııa departamenti bastyǵynyń orynbasary Berik Ábilbekov.
Qazir «qarý men oq-dárilerdi zańsyz saqtaý» deregi boıynsha QR QK-niń 287-baby 3-bóliginiń normalaryna sáıkes, sotqa deıingi tergeý amaldary júrgizilýde. Tárkilengen qarý-jaraq arsenaly saraptamaǵa jiberildi, onyń qorytyndysy boıynsha tárkilengen qarý-jaraq pen oq-dárilerdiń shyǵý tegi jáne ıesi anyqtalatyn bolady.