Almatyda 78 ana qaıtarymsyz grant arqyly kásibin bastady
Byltyr 4 aı ishinde ortalyqqa 1246 adam tirkelgen. 11789 qyzmet kórsetilgen.
Sondaı-aq, «Atameken» UKP arqyly 78 ata-ana bilim alyp, qaıtarymsyz grantqa ıe bolyp kishigirim kásibin dóńgelete bastady.
«Ortalyqtyń jumysy barysynda kópbalaly jáne az qamtylǵan otbasylardyń ár múshesi tap bolatyn naqty ómirlik qıyndyqtaryn kórdik. Bul bizdiń ortalyqtyń Naýryzbaı aýdany men jalpy qalanyń barlyq memlekettik qurylymdarymen belsendi jáne ózara árekettesýine yqpal etti. Mundaı otbasylardyń kóptegen máseleleri jalpy psıhologııalyq zańdyq jáne áleýmettik saýatsyzdyqtardan týyndaıdy. Sondyqtan 2019 jyl «Baqytty otbasy» ortalyǵynyń jumysy muqtaj adamdarǵa der kezinde kómek berýdiń qanshalyqty mańyzdy ekendigin kórsetti. Biz osy joba arqyly adamdardyń ómirin ózgertýge bolatynyn túsindik», - dedi ortalyq jetekshisi Sana Jandaı.
Onyń aıtýynsha, byltyr 78 áıel óz kásibin bastaý úshin qaıtarymsyz grant alǵan.
«Olarǵa 202 AEK mólsherinde, ıaǵnı árqaısysyna 505 myń teńge kóleminde qaıtarymsyz grant berildi. Bul qarajat az bolsa da shaǵyn startap bastaýǵa kóp kómegin tıgizedi. Áıelderdiń kópshiligi saýda, bıýtı sala, aspazdyq, tigin bıznesi boıynsha kásibin ashyp jatyr», - dedi Sana Jandaı.
Atalǵan ortalyqtyń úılestirýshisi Naǵıgúl Beısembına ortalyqqa kóbinese ózine ózi senimsiz adamdar keletinin aıtty.
«Eń aldymen ortalyq arqyly bilim alǵysy keletin adamdar iriktelip, arnaıy tegin kýrstarda oqytylady. Alǵashynda osyndaı oqytýǵa biz adamdardy ákele almaǵanbyz. Sebebi, jalǵyzbasty, kópbalaly analar qaraıyp qalǵan, qalanyń qaınaǵan tirliginen qol úzip qalǵan. Bizge kelgende senimsiz bolyp keledi. Bizdiń jan-jaqty kómegimiz olardy óz kásibin bastaýǵa qanattandyrady. Qazir jazylyp qoıǵan adam sany kóp», - dedi N. Beısembına.