Almatyda 78 adam ómir boıyna júrgizýshi kýáliginen aıyryldy
Almaty qalalyq polıtsııa departamentiniń málimetinshe, anyqtaý basqarmasy bir jarym jyl ishinde QR QK-niń 346-baby 1 jáne 2-bólikterinde kózdelgen qylmys belgileri boıynsha 66 qylmystyq isti tergep, sotqa joldaǵan.
«Sot sheshimimen 78 júrgizýshi ómir boıyna kólik quralyn basqarý quqyǵynan aıyryldy. Sonymen qatar, olarǵa 1 jyldan 6 jylǵa deıin bas bostandyǵynan aıyrý jazasyn óteýdiń naqty merzimi taǵaıyndaldy. Qazirgi tańda 8 qylmystyq is sot tergeýinde», - dedi Almaty qalalyq anyqtaý basqarmasynyń bastyǵy Oljas Sháripov.
Ustalǵan júrgizýshiler arasynda qylmysyn birneshe márte qaıtalǵandar da bar. Solardyń biri – A. esimdi azamat. Mamandandyrylǵan patrýldik polıtsııa batalonynyń ekıpajyna Baıtursynuly men Qarasaı batyr kósheleriniń qıylysynda ustaldy. Narkologııalyq saraptama kórsetkendeı, júrgizýshi ortasha dárejedegi alkogoldik masań kúıde boldy.
«Alǵash ret kólik júrgizý quqyǵynan 2017 jyly aıyryldym, rólge mas kúıde otyrdym. Jaza merzimi bitken joq. 2020 jyly taǵy da mas kúıde ustaldym. Sol kezde men QR QK-niń 346-baby 1-bóligi boıynsha qylmystyq jaýapkershilikke tartyldym jáne ómir boıyna kólik júrgizý quqyǵynan aıyryldym. Biraq, ótken kúni meni taǵy da toqtatty, taǵy masań kúıde boldym. Bul isime qatty ókinemin», - dedi ol.
Eske salsaq, jýyrda Almatynyń jergilikti polıtsııa qyzmeti reıdtik is-shara kezinde 4 kúnde mas kúıinde kólik aıdaǵan 21 júrgizýshini ustaǵan bolatyn.