Almatyda 7 myńnan astam stýdent hostelderge ornalasýda – mınıstrlik

ALMATY. QazAqparat - Almatyda stýdentterdiń tek 30% jataqhanamen qamtamasyz etilgen. Qalǵan 30% baspana jaldasa, 40% týystary men jaqyndarynyń úıinde turyp oqýda. Bul týraly Ǵylym jáne joǵary bilim vıtse-mınıstri Qýanysh Erǵalıev aıtty, dep habarlaıdy QazAqparat tilshisi.

Vıtse-mınıstrdiń aıtýynsha, Almatyda jataqhanalardyń oryn tapshylyǵy máselesin sheshý úshin mınıstrlik pen qala ákimdigi tarapynan jumystar júrgizilýde.

«Biz qala ákimdigimen birlese stýdentter úshin hostel, qonaqúılerdiń ıelerimen kelisim jasastyq. Sonyń nátıjesinde qazir 7 myńnan astam stýdentke oryn tabylyp, sonda ornalasyp jatyr. Mysaly, Abaı atyndaǵy QazUPÝ búginde 4 hostelmen kezdesip, myńnan astam stýdenttiń turýyna múmkindik jasady», - dedi Qýanysh Erǵalıev.

Ol sondaı-aq memlekettik-jekeshelik áriptestik aıasynda sońǵy úsh jylda jataqhanalardyń qarqyndy túrde salynyp jatqanyn atap ótti.

«Ótken jyly Qazaqstanda shamamen 49 jataqhana salyndy. Bıyl 40-qa jýyq jataqhana salynady dep josparlandy. Bul, stýdentter úshin qosymsha 10 myńnan astam tósek-oryn bolady degen sóz. Prezıdent óz Joldaýynda da osy máseleni kóterip, bizge tıisti tapsyrma berdi. Qazir ol boıynsha ınvestorlardy tartyp jumys jasap jatyrmyz. Qysqasha aıtqanda, qazirgi tańda Qazaqstanda jataqhanalarda oryn tapshylyǵy máselesin sheshý jumystary júrip jatyr», - dedi Ǵylym jáne joǵary bilim vıtse-mınıstri Qýanysh Erǵalıev.

Vıtse-mınıstr sondaı-aq Qazaqstan boıynsha stýdentterdiń 30% Almatyda oqıtynyn aıtty.

«Bul shamamen 35 joǵary oqý orny bar Almaty qalasynda 180 myń stýdent oqıdy degen sóz», - dedi ol.

Eske salaıyq, Ǵylym jáne joǵary bilim mınıstrligi Almatyda stýdentter dalada qonyp júr degen aqparattyń shyndyqqa janaspaıtynyn málimdegen bolatyn.