Almatyda 661 ıesiz elektr jelisi qala menshigine ótti
Bul jaıynda Almaty qalalyq memlekettik aktıvter basqarmasynyń basshysy Rústem Álıev onlaın brıfıng barysynda aıtty. Onyń aıtýynsha, osy ýaqytqa deıin 661 nysan qabyldanǵan.
«Osy maqsatta bıylǵy jyly «Alataý jaryq kompanııasy» AQ-na 117elektr jelisiniń nysany berildi. 2019 jyly «AJK» AQ-na elektr jelileri men jabdyqtarynyń 544 nysany tapsyryldy. Barlyǵy eki jylda 661 nysan ótti. Bul sharalar qala turǵyndaryna sapaly kommýnaldyq qyzmetti alýǵa, tarıfterdiń tómendeýine jáne jalpyqalalyq tarıftermen teńestirilýine alyp keledi», - dep atap ótti Rústem Álıev.
Sonymen qatar, ıesiz jelilerdi qala ıeligine berý kommýnaldyq qyzmetterge tótenshe jaǵdaılarda jedel áreket etýge múmkindik beredi, óıtkeni olar tirshilikti qamtamasyz etý obektilerindegi kommýnaldyq apattardyń basty sebepteriniń biri.
«Injenerlik jelilerdi ıesiz dep taný rásimi QR Azamattyq kodeksiniń 242-babyna sáıkes júzege asyrylady. Atap aıtqanda, aýdandyq ákimdikter turǵyndardyń ótinishterin jınaıdy, energııa tıimdiligi jáne ınfraqurylymdyq damý basqarmasy men kommýnaldyq qyzmetterdi jetkizýshilermen birlesip, qaıtalanýdy boldyrmaý maqsatynda ıesiz obektilerdiń tizbesi daıyndalady. Budan ári ıesiz obektilerdiń tizbesi memlekettik aktıvter basqarmasyna jiberiledi, basqarma óz kezeginde obektilerdi ıesiz dep taný sharasyn bastaıdy»,– dedi ol.