Almatyda 646 adam daýys berý quqyǵyn beretin esepten shyǵarý kýáligin aldy

ALMATY. QazAqparat - Almatyda ýchaskelik saılaý komıssııasy 646 saılaýshyǵa daýys berý quqyǵyn beretin esepten shyǵarý kýáligin berdi. Bul týraly brıfıng barysynda qalalyq referendým komıssııasy tóraǵasynyń orynbasary Aıgúl Qalyqova aıtty, dep habarlaıdy QazAqparat tilshisi.

«Daýys berý kúni Almatyda bolatyn, biraq bastapqyda basqa óńirlerde tirkelgen jeri boıynsha tizimge engen azamattar Almatynyń kez kelgen ýchaskesinde daýys berý quqyǵyn beretin esepten shyǵarý kýáligi arqyly daýys bere alady», - dep túsindirdi Aıgúl Qalyqova.

Spıkerdiń sózinshe, 646 almatylyq daýys berý quqyǵyn beretin esepten shyǵarý kýáligin alǵan. Olar sol arqyly basqa óńirlerde daýys beredi.

«Múmkindigi shekteýli azamattar úshin (densaýlyq jaǵdaıy boıynsha nemese otbasynyń naýqas múshesiniń kútimine baılanysty) úıde daýys berý uıymdastyrylady. Ol úshin aldyn ala ótinish jazý kerek. Mundaı ótinishter 5 maýsym túski saǵat 12:00-ge deıin qabyldanady»,- dedi ol.

Eske salsaq, 5 maýsymda tańǵy saǵat 7.00-den keshki saǵat 20.00-ge deıin Qazaqstan Respýblıkasynyń Konstıtýtsııasyna túzetýler boıynsha jalpyulttyq referendým ótedi.