Almatyda 600 saılaý ýchaskesi jumys isteıdi

ALMATY. QazAqparat - Óńirlik kommýnıkatsııalar qyzmetinde ótken baspasóz májilisinde Almaty aýmaqtyq saılaý komıssııasynyń tóraıymy Janna Asanova saılaý ýchaskeleriniń daıyndyǵy týraly aıtyp berdi, dep habarlaıdy QazAqparat tilshisi.

«Almatyda Prezıdent saılaýyna baılanysty 600 saılaý komıssııasy quryldy. Segiz aýdandyq jáne bir qalalyq saılaý komıssııasy jumystaryn bastaýda. Qazirgi ýaqytta aýdandyq ákimdiktermen birlesip saılaýshylardyń tizimi rettelip jatyr. Árbir azamat eger saılaý tiziminde bolmasa nemese basqa qalada tirkelgen bolsa, aryzdanyp, ózin tizimge engize alady. Bul shara 30 qazanǵa deıin jalǵasady. Odan keıin ózin tizimge qosý múmkindigi joıylady. Osyny eskerý qajet», - dedi Janna Asanova.

Sonymen qatar, spıker 30 qazannan keıin esepten shyǵarý kýálikteri beriletinin aıtty.

«Esepten shyǵarý kýálikterin alǵan turǵyndar basqa qalada, óńirde daýys bere alady. Qazirgi ýaqytta bizdiń qyzmetimiz - azamattardyń kandıdatty qoldap jınalǵan qoldaryn tekserý»,- dedi ol.

Eske salaıyq, QR Prezıdentiniń kezekten tys saılaýy 20 qarashada ótedi.