Almatyda 600-den astam kómekke muqtaj otbasy ortalyq meshitten kómek alyp keledi

ALMATY. QazAqparat - Almatydaǵy kómekke muqtaj otbasylar qaladaǵy meshitterden únemi kómek alyp otyrady. Bul týraly óńirlik kommýnıkatsııalar qyzmetiniń baspasóz máslıhatynda Almaty qalasy bas ımamynyń birinshi orynbasary Erjan Esim aıtty, dep habarlaıdy QazAqparat tilshisi.

«Almaty ortalyq meshitinde 600-den astam kómekke muqtaj otbasy tirkelgen. Olar árdaıym ortalyq meshitten kómekter alyp turady. Qaladaǵy 52 meshittiń árbirinde osyndaı muqtaj otbasylar tirkelgen. Olarǵa kómek kórsetý halyqtyń meshitke bergen qarajatynan júzege asyrylady», - dedi Erjan Esim.

Sondaı-aq onyń aıtýynsha, bıyl pitir sadaqasyn unmen, qarajatpen jáne ramadan2022.kz saıtyndaǵy arnaıy «pitir sadaqa berý» batyrmasy arqyly berýge bolady.

Almaty Ortalyq meshitiniń ustazy Rýslan Qaıyrgeldi qaladaǵy 52 meshittiń 47-sinde taraýıh namazdary oqylyp, quran hatym túsiriletinin aıtty.

«Sondaı-aq, qala meshitterinde túski jáne keshki namazadardan keıin dáris, sabaqtar ótkiziletin bolady. Ol jerden siz ózińizdi tolǵandyrǵan suraqtaryńyzǵa jaýap ala alasyz», - dedi ol.

Almaty qalasynyń bas ımamy Tólebı Ospan «qadir túni» jaıly óz oıyn aıtty.

«Qadir túni - ramazan aıyn erekshe etetin qudaıdyń bir syıy. Bul myń aıǵa teń keletin tún. Bul túndi uıqysyz ótkizsem degen maqsat joq. Degenmen, bul túndi qulyshylyqpen ótkizgen jón. ıAǵnı, namaz oqý, quran oqý, duǵa jasaý syndy is árekettermen ókitzgen durys»,- dedi bas ımam.