Almatyda 60-tan astam art-nysan salynady
Almatyda alǵash ret PARK FEST Halyqaralyq músin men sáýlet óneri festıvali bastaldy. Shara qala kúni aıasynda megapolıs ákimdiginiń qoldaýymen ótip jatyr.
«Halyqaralyq festıval qalamyzda alǵash ret ótýde. Munda baıqaýdyń irikteý týrynan ótken sýretshiler jumystary tanystyrylady. Barlyǵy 500 ótinish tústi. Olardyń ishinen qazylar sheshimimen 3 sanat boıynsha týyndylar tańdap alyndy»,- deıdi «Almaty Mádenıet jáne muraǵattar basqarmasy» KMB ákimshilik bóliminiń bastyǵy Aınur Ýalıeva.
Qazylar alqasy quramynda Nıý-Iorktegi pablık art departamentiniń dırektory Kendal Genrı, Vena zamanaýı óner jármeńkesiniń dırektory Krıstına Shteınbreıher, Krasnoıarsk mýzeı bıennallesiniń turaqty kýratory Sergeı Kovalevskıı jáne ǵalym Evfrat Imambek bar.
Qyrkúıektiń sońyna deıin 60-tan asa art-nysan salynady. Túrli stıldegi obektilerdiń qaı jerge qoıylatyny naqtylanyp jatyr.
«Almatydan aspan astyndaǵy mýzeı ashamyz. Tamyzda ótken halyqaralyq sımpozıýmda ónerdiń qala keńistigindegi róli týraly aıtylǵan bolatyn. Sondaı-aq, 9 qyrkúıekte «Sálem, kórshiler» atty mádenı pıknık ótkizemiz. Ol Tımırıazev -Shashkın qıylysyndaǵy saıabaqta belsendi tynyǵý retinde uıymdastyrylady. Qala turǵyndaryn birneshe aımaqqa bólingen shaǵyn ortada mádenı ıntellektýaldy oıyn-saýyq ótkizýge shaqyramyz. Munda sheberlik sabaqtary uıymdastyrylady. Belarýs, Tájikstan, Qyrǵyzstan sýretshileri adamdardyń kóz aldynda músin jasap, ol dúnıeler osy saıabaqta qalady»,-dedi PARK FEST festıvaliniń uıymdastyrýshysy Olga Sultanova.
Josparlanǵan art-nysandardyń biri - «qyzyl adamdar» Abaı metro stantsııasynyń janynda tur. Uıymdastyrýshylardyń aıtýynsha, aldaǵy ýaqytta paıda bolatyn obektiler qala ómirimen tikeleı baılanysty bolmaq.
Aıta ketý kerek, pıknık senbi kúni saǵat 11.00-de bastaly, 19.00-ge deıin jalǵasady. Kelem deýshilerdi janǵa jaıly mýzyka men fýdkort, sondaı-aq beıneleý óneriniń sheberlik sabaqtary kútip tur.