Almatyda 5G jelisi qashan engiziledi

ALMATY. QazAqparat – Almaty ákiminiń orynbasary Saparbek Tuıaqov qalada 5G jelisin engizý týraly oıymen bólisti, dep habarlaıdy QazAqparat tilshisi.

Saparbek Tuıaqov búgin Almaty Invest Forum aıasynda «Qazaqtelekom» AQ-men memorandýmǵa qol qoıylǵanyn aıtty.

«Biz optotalshyqtardyń qaı jerde jetpeı turǵanyn bilemiz. Mamandar qalada jeliler qaı jerde jetispeıtindigi, qaı jerde suranys kóptigin taldaýdan ótkizdi. Osyny eskere otyryp, biz qalada eń tutynýshylarǵa qajettiligi joǵary jerlerdi anyqtadyq. Búgingi kelisimshart aıasynda kommýnıkatsııalyq jobalardy keshendi júzege asyratyn bolamyz. Buǵan tek 5G kirmeıdi, munda optotalshyqtar da bar. Bizdiń esep boıynsha bul jobalardyń quny 200 mlrd teńgege deıin barady. Bul – qyrýar qarajat. Bul jobalar qalanyń kommýnıkatsııalyq ınfraqurylymyn arttyratyn bolady», - dedi Saparbek Tuıaqov.

Qala ákiminiń orynbasary 5 jyldaǵy josparmen bólisti.

«Suranys bar jerlerge, optotalshyqtar bar jerlerge 5G jelisin qosamyz. Bul úshin tutas qalany qamtýdyń qajettiligi joq. Qalada kreatıvti ındýstrııa parki ashylatynyn aıtqan bolatynbyz. Ol jerge máselen, myqty ınfraqurylym, sýper kompıýterler, myqty baılanys, ǵalamtor kerek», - dedi ákimniń orynbasary.

Aıta ketý kerek, Qazaqstanda birinshi bolyp 5G kommertsııalyq jelisi Nur-Sultanda bıyl iske qosyldy.