Almatyda 500 jas muǵalim 30 mln teńge tólem aldy

ALMATY. QazAqparat - Almatyda bıyl 240 jas muǵalim páter alyp, taǵy 500 muǵalim 30 mln teńgeden asa áleýmettik tólem aldy, dep habarlaıdy QazAqparat tilshisi.

Bul málimetti qalalyq Bilim berý basqarmasy basshysy Lázzat Jylqybaeva QR BǴM ókilderimen ótken apparattyq jıynda keltirdi.

Basqarma basshysy 2020-2025 jyldarǵa arnalǵan bilim berý baǵdarlamasyn usyndy.

«Biz úshinshi jyl qatarynan pedagogıkalyq JOO támamdaǵan jas muǵalimderge 20 AEK mólsherinde bir rettik tólem tóleımiz. Bul jumys ary qaraı jalǵasatyn bolady», - dedi ol.

Onyń aıtýynsha, qalada 500 jas muǵalimge 30 mln teńgeden astam tólem tólengen.

Odan bólek Almatyda muǵalimder úshin baspana máselesi óte ózekti bolyp tur.

«Osyǵan baılanysty bıyl Almaty jastary 3:0 baǵdarlamasy aıasynda 240 muǵalimge baspana berildi. Negizi bıyl muǵalimderge 310 páter bólingen. Shart boıynsha 13 mln teńgege deıin nesıe alýǵa bolady. Muǵalimderge qalada turý shart emes. Bul baǵdarlamaǵa kez kelgen muǵalim qatysa alady», - dedi ol.

Lázzat Jylqybaeva «Úzdik pedagog» baıqaý týraly da aıtyp berdi.

«Baıqaý jeńimpazdary 1 mln teńgege deıin grant, kólik, 2 bólmeli páter utyp ala alady», - dedi spıker.

Odan bólek taǵy 10 muǵalim árqaısysy 2 mln teńgeden Almaty ákiminiń arnaıy grantyn aldy.