Almatyda 50 jańa trolleıbýs satyp alynady

ALMATY. QazAqparat – Qalanyń qoǵamdyq kólik júıesin damytý úshin 50 jańa trolleıbýs satyp alynady. Bul týraly Erbolat Dosaev jergilikti bıýdjetti naqtylaý jóninde ótken máslıhattyń XXII sessııasynda aıtty, dep habarlaıdy QazAqparat tilshisi.

Aıtýynsha, bıýdjetke engizilgen túzetýler eń aldymen, Almaty turǵyndarynyń talap-tilekterin eskere otyryp, áleýmettik basymdyqtardy iske asyrýǵa baǵyttaldy.

«Qalanyń kólik ınfraqurylymyn damytýǵa 13,6 mlrd teńge qarastyrylǵan. Jol qozǵalysy qaýipsizdigin qamtamasyz etý úshin (jol belgilerin salý) qosymsha 500 mln teńge bólindi. Buqtyrma-Qulja jolaıryǵynyń qurylysyn aıaqtaýǵa 2,4 mlrd teńge, joldardy orta jáne aǵymdaǵy jóndeýge 1,7 mlrd teńge bólinedi. Sonymen qatar, 6,3 mlrd teńge 50 trolleıbýs satyp alýǵa baǵyttalady, bul qoǵamdyq kólikpen qyzmet kórsetý sapasyn arttyrýǵa oń áserin tıgizedi», - dedi ákim.

Buǵan deıin habarlanǵandaı, Almatyda halyq sanynyń ósýi men oqýshy ornynyń tapshylyǵyna baılanysty 5 jańa mektep salynbaq.

Sondaı-aq, qalada taý betkeıinde qurylys júrgizýge tyıym salyndy jáne basym bóliginde 9 qabattan joǵary ǵımarattar salynbaıdy.