Almatyda 5 myńnan astam «Sergek» beınekamerasy kúndelikti jol tártibin qadaǵalaıdy

ALMATY. QazAqparat - Almaty qalalyq polıtsııa departamentiniń ákimshilik polıtsııa basqarmasynyń aǵa ınspektory Samat Ábjaparov qalada jol erejesin buzǵan kólik júrgizýshilerden aıyppul óndirý sharalary týraly aıtty, dep habarlaıdy QazAqparat tilshisi.

Spıkerdiń aıtýynsha, Almatyda avtomatty rejımde 766 «Sergek» avtomattandyrylǵan baǵdarlamalyq qamtamasyz etý júıesi jumys isteıdi, bul degenińiz 5034 beınekamera.«Olar qalada jyldamdyqty asyrý, jol belgilerin elemeý, baǵdarshamnyń tyıym salynǵan túsine ótý jáne qoǵamdyq kólikke arnalǵan jolaqpen júrý sekildi ákimshilik quqyq buzýshylyqtardy anyqtaıdy. Atalǵan quqyqbuzýshylyqtar boıynsha ákimshilik nusqaýlar Ákimshilik óndiristiń biryńǵaı tizilimi óńdeý ortalyǵynyń derekter bazasynda qalyptasady. Odan soń kólik ıelerine sms-habarlamalar jiberiledi. Kólik ıeleri ákimshilik aıyppuldy 7 kún ishinde 50% jeńildikpen tóleıdi. Jeti kúnnen soń aıyppul 100% somaǵa aýystyrylady jáne 30 kún ishinde erikti túrde tólenedi. QR ÁQBtK-niń 894-babyna sáıkes, 30 kún ótken soń májbúrlep tóletý úshin Jeke sot oryndaýshylar palatasyna joldanady», – dedi Almaty qalasy PD ÁPB-nyń ákimshilik tájirıbe bóliminiń aǵa ınspektory Samat Ábjaparov.

Ol sondaı-aq qala aýmaǵynda boryshkerlerdi, óz erkimen ákimshilik aıyppuldy ýaqtyly tólemegen adamdardy anyqtaý boıynsha turaqty túrde sharalar qabyldanyp jatqanyn atap ótti.