Almatyda 474 mektep bitirýshi «Altyn belgi» aldy
«Altyn belgi» tósbelgisimen 5-synyptan 11-synypqa deıingi oqý úzdikteri marapattalady. Bıyl Almaty qalasy mektepteriniń 474 túlegi «Altyn belgi» joǵary nagradasyna ıe bolý quqyǵyn rastady, onyń ishinde qala mektepteriniń 423 túlegi jáne 51-i – respýblıkalyq mektepter bitirýshisi (NZM, RFMM, Abaı atyndaǵy daryndy balalarǵa arnalǵan respýblıkalyq orta mektep-ınternaty).
Almaty qalasy bilim basqarmasynyń basshysy Lázzat Jylqybaeva, segiz aýdan ákimi men bilim berý ardagerleri ár túlekke «Altyn belgi» joǵary marapatyn tapsyrdy.
«Altyn belgi» ıelengen túlekterdi osy aıtýly kúnmen shyn júrekten quttyqtaımyn, sizder qalamyzdyń maqtanyshysyzdar. Alǵa umtylyp, júrekteriń qalaǵan mamandyqty alýdy tileımin. Jastardyń bolashaq jetistikteri eldiń damýyna zor úles qosatynyna senimdimin. Men ónegeli urpaq tárbıelegen muǵalimder men ata-analarǵa alǵys bildiremin. Barlyq úmitterińiz ben armandaryńyz oryndalsyn!» - dedi qalalyq bilim basqarmasynyń basshysy Lázzat Jylqybaeva.
Aıta keterligi, «Altyn belgimen» marapattalǵandardyń konkýrs kezinde bilim berý grantyn alýǵa basym quqyǵy bar. Sonymen qatar, bıyl halyqaralyq zııatkerlik olımpıadalar men ǵylymı jarystarda 7 altyn, 11 kúmis jáne 23 qola medal jeńip alǵan megapolıs oqýshylary da marapattaldy.
2023 jyly Almaty mektepterin barlyǵy 14 876 oqýshy, onyń ishinde memlekettik mektepterdi 12 682, jekemenshik mektepterdi 2 194 bala bitirdi.
Merekelik marapattaý barysynda túlekter sherýine qosa mazmundy kontserttik baǵdarlama usynyldy. Sahnada qonaqtar aldynda túlekter men «Rise» shoý-baleti, Aıqyn Tólepbergen, Alpha toby jáne qazaqstandyq estradanyń basqa da ártisteri óner kórsetti.
Saltanatty is-shara sońynda túlekter dástúr boıynsha Dınaıdyń «Qus joly» áni yrǵaǵymen mekteppen qoshtasý valsin oryndady. Bul balalyq shaqtaǵy estelikterdiń sońǵy akkordy boldy, ony árkim ómir boıy júreginde saqtaıdy.