Almatyda 337 turǵyn koronavırýs juqtyrǵanyna qaramastan kınoǵa barǵan

ALMATY. QazAqparat - Almatyda ózin-ózi oqshaýlaý rejımin buzǵany úshin «qyzyl» mártebesi bar 3144 turǵyn iri aıyppul tóledi, olardyń esimi BAQ-ta jarııalandy. Bul týraly Almaty qalasy sanıtarııalyq-epıdemıologııalyq baqylaý departamenti basshysynyń mindetin atqarýshynyń orynbasary Sádýaqas Baıǵabylov málimdedi, dep habarlaıdy QazAqparat tilshisi.

Spıker «qyzyl» mártebe qozǵalysty shekteý, ambýlatorııalyq baqylaýdaǵy adamdar úshin úıde oqshaýlaýdyń qatań rejımin saqtaýdy bildiretinin eske saldy.

Almatylyqtar bul máselege jaýapkershilikpen qaramaı, qoǵamdyq oryndarǵa barýǵa tyrysqan.

Mysaly, 9 sáýirden bastap búginge deıin Almaty qalasynyń 11 051 turǵynynda «qyzyl» jáne 1355 adamda «sary» mártebesi rastaldy.

Tekserýshiler 3251 «qyzyl» men 431 «sarynyń» qoǵamdyq tamaqtaný ornyna barýǵa tyrysqanyn anyqtady.

«Qyzyl» mártebesi bar taǵy 2309 turǵyn saýda ortalyǵyna kirgisi kelgen, 788-i bazarlardyń kireberisinde, 796-y dúkenderde, 446 «qyzyl» jáne 49 «sary» áýejaıda anyqtaldy.

Ashyq qosymshasynyń arqasynda HQO-larǵa 390 vırýs juqtyrǵan jáne 36 baılanysqa túsken adam kirgen joq.

Vırýs juqtyrǵan 337 turǵynnyń kınoteatrlarǵa kirýdiń joly kesildi.

«Bul mártebelerdi kórsetý bızneske óz qyzmetin jalǵastyrýǵa jáne kelýshilerge qaýip tóndirmeýge múmkindik berdi. Oqshaýlaý rejımin buzýshylarǵa ákimshilik sharalar qoldanylady, olarǵa 30 AEK kóleminde aıyppul salynady», - dedi S. Baıǵabylov.

Ashyq paıdalanýshylar tiziminde anyqtalǵan 387 «qyzyl» jáne 58 «sary» mártebesi barlar fıtnes-ortalyqtarǵa, basseınderge, taǵy «qyzyl» mártebesi bar 186 adam sulýlyq salondary men shashtarazdarǵa kire alǵan joq.