Almatyda 32 adamnan koronavırýstyń «brıtandyq shtamy» anyqtaldy

ALMATY. QazAqparat - Almaty ákimi Baqytjan Saǵyntaev óńirlik kommýnıkatsııalar qyzmetinde ótken onlaın brıfıngte neshe adamnan «brıtandyq shtamm» anyqtalǵanyn aıtty, dep habarlaıdy QazAqparat tilshisi.

«Qaladaǵy úzdik zerthanalardyń birimen kelisip brıtandyq shtamdy tabý úshin zertteý júrgizip jatyrmyz. Onyń reaktıvi basqasha bolady, kúndelikti PTR-ge alyp júrgen reaktıv emes. Arnaıy sol shtamdy tabýǵa arnalǵan. Ol boıynsha 40 reaktıv ákelindi, sonyń 32-si nemese 78%-de brıtandyq shtamm kórsetildi», – dedi qala ákimi.

Sondaı-aq ol qaladaǵy agrarlyq ýnıversıtettiń zerthanasynda da tekseris júrgizilip jatqanyn jetkizdi.

«Olar Dúnıejúzilik densaýlyq saqtaý uıymy granty boıynsha jumys istep jatyr. Ondaǵy ǵalymdar júzden asa zerttemeniń ishinen 56 paıyz jańa shtamdy anyqtaǵan. Olar mundaı tekseristi kúnde júrgizbeıdi, bir rettik zerttememen bizde jańa shtamnyń bar-joǵyn anyqtaıdy. Densaýlyq saqtaý mınıstriniń málimetinshe jańa shtamdar elimizdiń 13 óńirinde anyqtalǵan», - dedi ol.

Baqytjan Saǵyntaev bul eki shtamnyń juqtyrý deńgeıi óte joǵary ekenin eske saldy.