Almatyda 300 myńnan astam zeınetker «Belsendi uzaq ómir» ortalyǵyna barady
Ortalyqtyń maqsaty aǵa urpaqty belsendi zııatkerlik, shyǵarmashylyq, qoǵamdyq qyzmetke tartý. Belsendi ómir súrý uzaqtyǵyn arttyrý jáne qart adamdardyń qoǵamdyq ómirdegi rólin jaqsartý. Sol boıysha túrli is-sharalar ótkizý.
Qazirgi ýaqytta Almatyda «Belsendi uzaq ómir» 9 ortalyǵy (BUÓO) jumys isteıdi, 21 myńnan astam adam tirkelgen, 300,7 myń adam qyzmettermen qamtylǵan.
2020 jyly Tótenshe jaǵdaı jarııalanýyna baılanysty ortalyq qashyqtan qyzmet kórsetýge aýysty. Gerıatordyń, psıhologtyń, medbıkeniń keńesteri onlaın nemese telefon arqyly júrgizildi. Skandınavııalyq júris, oqytý kýrstary, shahmat, bı jáne t.b. boıynsha sabaqtar onlaın júrdi. Barlyǵy 4 706 zeınetker onlaın qyzmet aldy. Qarttar kúni men aılyǵyna arnalǵan is-sharalarǵa 1,5 myń adam qatysty. Sonymen qatar, 200 zeınetker úshin ekskýrsııalar ótkizildi.
Budan basqa, Almaty ákimi Baqytjan Saǵyntaevtyń tapsyrmasy boıynsha «Shyńǵa órleý» áleýmettik klýby jobasyn iske asyrý bastaldy. Maqsaty – kishi mektep jasyndaǵy balalarǵa ómirlik tájirıbe, bilim men daǵdylardy berý arqyly qıyn ómirlik jaǵdaıǵa tap bolǵan aǵa býyn ókilderin qoǵamdyq ómirge tartý.
Klýbtyń ókilderi zeınetkerler, eńbekke qabiletti múgedek adamdar, az qamtylǵan kópbalaly otbasylardan shyqqan 1-4 synyp balalary, erekshe qajettilikteri bar balalar boldy. Onlaın rejıminde turmysy tómen otbasylardan shyqqan 510 bala klýbtarmen qamtyldy. Offlaın rejıminde 390 bala oqıdy. Zeınetkerler men múgedektigi bar adamdardan 72 pedagog jumysqa ornalastyryldy.
Almatyda iske asyrylyp jatqan áleýmettik jobalar arasynda – «Táýelsiz ómir mektebi» bar. Onda óz múmkindikterin bilmeý nemese otbasy tarapynan gıper-qamqorlyq saldarynan qoǵamnan oqshaý turatyn múgedek adamdarǵa qoldaý kórsetiledi. Múgedektikke baılanysty qorqynysh pen belgisizdikti jeńý, ózin-ózi baǵala bilý jáne maqsat qoıý daǵdylaryn qalyptastyrý jáne óz ómirin josparlaý boıynsha jumystar júrgizilýde. 48 múgedek adam jattyqtyrýshylardyń qatysýymen «Aq Bastaý» saýyqtyrý pansıonatyna baryp, turý arqyly 7 kúndik kýrstarda oqydy. Sondaı-aq, 172 adamdy qamtı otyryp, «TenQogam» múmkindigi shekteýli adamdardy jumysqa ornalastyrý ortalyǵy jobasy iske asyrylýda.