Almatyda 300-ge jýyq restoran tabysyn jasyryp kelgen - komıtet

NUR-SULTAN. QazAqparat - Elimizdegi restorandar qyzmetkerleriniń sanyn jasyryp, kassa apparattaryn qoldanbaıdy nemese fıskaldyq chekti aıyna 1 ret shyǵaryp, óz kirisin kórsetpegen, dep habarlaıdy QazAqparat Memlekettik kirister komıtetiniń baspasóz qyzmetine silteme jasap.

Memleket shaǵyn kásipkerlik sýbektilerin fıskaldy qoldaý sharalaryn jalǵastyryp kele jatqanyna qaramastan, elimizdiń meıramhanalary ózderiniń kirisin jasyrýdy jalǵastyrýda.

«Memlekettik kirister komıteti atalǵan saladaǵy salyq tóleýshilerdiń salyqtyq mindettemelerin oryndaýyn qashyqtan baqylaýdy ótkizý barysynda astanada jáne respýblıkalyq mańyzy bar qalalarda qyzmetin júzege asyratyn ártúrli ınternet saıttarda óz qyzmetin jarnamalaıtyn meıramhanalardyń tizimin paıdalandy», - dep málimdedi QR QM Memlekettik kirister komıteti salyqtyq ádisnama departamentiniń dırektory Jánibek Nurjanov.

Baqylaýdyń aldyn ala nátıjesine sáıkes, Nur-Sultan qalasynan 164 meıramhana boıynsha 37 salyq tóleýshi salyq esebinde óz kirisin kórsetpegen, 31 meıramhana boıynsha jaldamaly qyzmetkerler joq jáne 41 meıramhana jaldamaly qyzmetkerler sanyn 1-5 aralyǵynda dep kórsetken. Odan basqa, qalanyń 6 meıramhanasynda baqylaý - kassa mashınalary joq, al BKM ornatqan meıramhanalardyń ishinde aıyna 1 ret fıskaldyq chekti shyǵaratyn - 1 meıramhana, kúnine 1 ret - 14 meıramhana anyqtaldy. Qalanyń 34 meıramhanasynda BKM boıynsha aınalym joq.

Osyǵan uqsas jaǵdaı Almaty qalasy boıynsha oryn alǵan. ıAǵnı, 275 meıramhana boıynsha 95 salyq tóleýshi salyq esebinde óz kirisin kórsetpegen, 123 meıramhananyń jaldamaly qyzmetkerleri joq, 24 meıramhana jaldamaly qyzmetkerler sanyn 1-5 aralyǵynda dep kórsetken. BKM boıynsha: fıskaldyq chekti aıyna 1 ret shyǵaratyn - 3 meıramhana, kúnine 1 ret shyǵaratyn - 13 meıramhana anyqtaldy. Almaty qalasy meıramhanalarynyń 83-de BKM boıynsha aınalym bolmaǵan.

Shymkent qalasynyń 85 meıramhanasy boıynsha óz kiristerin kórsetpeıtin 17 salyq tóleýshi anyqtaldy, 24 meıramhana jaldamaly qyzmetkerlerin kórsetpegen, 12 meıramhana jaldamaly qyzmetkerler sanyn 1-5 aralyǵynda dep kórsetken. Odan basqa, qalanyń 23 meıramhanasynda baqylaý - kassa mashınalary joq. BKM ornatylǵan meıramhanalar boıynsha: aıyna 1 ret fıskaldyq chekti shyǵaratyn - 2 meıramhana, kúnine 1 ret shyǵaratyn - 8 meıramhana anyqtalǵan. BKM boıynsha aınalymy joq 24 meıramhana anyqtaldy.

Bul rette Nur-Sultan, Almaty jáne Shymkent qalalary boıynsha atalǵan saladaǵy salyq tóleýshilerdiń 18 paıyzy 2018 jylǵy deklaratsııasynda jylyna 1 mln teńgege deıin nemese kúnine 3 000 tenge mólsherinde kiris kórsetken.

«Salyq mindettemelerin tolyq kólemde oryndamaıtyn barlyq salyq tóleýshilerge zańbuzýshylyqtardy joıý týraly habarlama joldandy. Osyndaı taldaý basqa oblystar boıynsha da júrgizilýde», - dep atap ótti Jánibek Nurjanov.