Almatyda 30 myńnan astam bala birinshi synypqa bardy
Almaty ákimdigi habarlaǵandaı, megapolıste birinshi synypqa barǵan balalar úshin 323 mektep esigin aıqara ashty. Onyń 215-i memlekettik bolsa, 108-i jekemenshik.
Bilim kúnine oraı qalada 10 jańa mektep ashyldy. Olar: Túrksib aýdanynyń Qaırat shaǵyn aýdanyndaǵy №211 memlekettik mektep jáne 3 000 oryndyq 9 jekemenshik mektep.
«Eki bilim oshaǵy – №48 jáne 9 mektep keńeıtildi, jyl sońyna deıin №148 mektepte 300 oryndyq qosymsha ǵımarat salý jumystary aıaqtalady», - dep habarlady ákimdiktiń baspasóz qyzmeti.
Eske salaıyq, búgin – Bilim kúni. Osyǵan oraı Memleket basshysy Qasym-Jomart Toqaev Instagram paraqshasynda ustazdar men oqýshylardy Bilim kúnimen quttyqtady.
Prezıdent óz quttyqtaýynda óskeleń urpaq elimizdiń erteńi ekenine toqtalyp, memleket jas órenderdiń sapaly bilim, taǵylymdy tárbıe alýy úshin barlyq jaǵdaıdy jasaıtynyn atap ótti.