Almatyda 30 ınnovatsııalyq joba «Tech Garden Fair» tehno-festıvalinde qoldaýshysyn tapty

ALMATY. QazAqparat - Almaty qalasynyń myńjyldyǵyn toılaý merekelik sharalary aıasynda «Tech Garden Fair» halyqaralyq tehnologııalyq festıvali ótti. Onda ónertapqysh ǵalymdardyń 30 ınnovatsııalyq jobasy qoldaýshysyn tapty. Bul týraly «Innovatsııalyq tehnologııalar parki» arnaıy ekonomıkalyq aımaǵynyń baspasóz qyzmetinen habarlady.

Aıta keteıik, «Tech Garden Fair»  jas ǵalymdardyń, ázirleýshilerdiń ınnovatsııalyq áleýetin damytyp, júzege asyrýǵa baǵyttalǵan Ortalyq Azııadaǵy eń iri tehnologııalyq festıvalderdiń biri.

Festıval ótken demalysta, qala kúni merekelik sharalary aıasynda «Innovatsııalyq tehnologııalar parki» arnaıy ekonomıkalyq aımaǵynda («ITP» AEA) ótti. Aýqymdy is-shara aıasynda jas ǵalymdar, ázirleýshiler men «startaptarǵa» arnalǵan «Tech Garden Cup» jáne «Startup Day» atty arnaıy tehnologııalyq baıqaýy uıymdastyryldy.

Festıvalǵa qatysýshylardan 500-deı ótinim túsip, tehnologııalyq baıqaý nátıjesi boıynsha, birneshe baǵytta óz týyndysyn usynǵan 30-ǵa jýyq jeńimpaz anyqtaldy.

Olar arnaıy syılyqtarǵa ıe bolyp, «Almaty Tech Garden» negizinde Orta Azııadaǵy eń úzdik akseleratsııa barysynda jobalaryn jetildirip, júzege asyrýǵa múmkindik alady.