Almatyda 3 myńnan astam azamatqa tegin zań kómegi kórsetildi
Azamat Esqaraev 2022 jyly birqatar zańnamalardyń túbegeıli ózgergenin aıtty. Atap aıtqanda: saıası partııalardyń, Qazaqstan halqy Assambleıasynyń, jergilikti memlekettik basqarý organdarynyń qyzmetin retteıtin zańdar ózgerdi. Bıyl alǵash ret 45 aýdan men oblystyq mańyzy bar qala ákimderiniń tikeleı saılaýy ótpek.
Sondaı-aq mınıstr zań kómegin kórsetý, azamattyq hal aktilerin tirkeý, jyljymaıtyn múlikke quqyqtardy tirkeý, zańdy tulǵalardy tirkeý, zııatkerlik menshik quqyqtaryn qorǵaý, atqarýshylyq is júrgizý sııaqty memlekettik qyzmetterdi damytý máselelerine toqtaldy.
Aıtýynsha, 2023 jyldyń 1 toqsanynda ǵana Almaty qalasynda úsh myńnan astam azamatqa tegin zań kómegi kórsetildi. 2022 jylǵy 20 maýsymnan bastap «Advokattyq qyzmet jáne zań kómegi týraly» zańyna quqyqtyq keńes berý túrinde tegin zań kómegine kepildik berilgen tulǵalar tobyn keńeıtetin ózgerister engizildi. Endi az qamtylǵan jáne kópbalaly otbasylar, turmystyq zorlyq-zombylyq qurbandary, azaptaý qurbandary, 1 jáne 2 sanattaǵy múgedekter, zeınetkerler tegin zań kómegin ala alady.
«Almaty qalasy boıynsha 24 memlekettik jáne 300 jeke sot oryndaýshy qyzmet atqarady. Qalada 2022 jyldyń mamyr aıynan beri alıment óndirip alýmen aınalysatyn tórt jeke sot oryndaýshysynan quralǵan jeke keńse jumys isteıdi. Alıment óndirip alý boıynsha mamandandyrylǵan keńseler ashý tájirıbesin ár óńirde keńinen taratý qajet dep sanaımyn», - dedi mınıstr.
Kezdesý dıalog formatynda ótti. Óńir turǵyndaryn mınıstrge atqarýshylyq is júrgizý, notarıat jáne tegin zań kómegin kórsetý salasyndaǵy máseleler týraly suraqtaryn qoıdy.