Almatyda 3,7 myńnan astam gektar jer paıdalanylmaı otyr

NUR-SULTAN. QazAqparat - Qazaqstan Prezıdenti Qasym-Jomart Toqaev Almaty qalasyn odan ári damytý máseleleri jóninde ótken keńes barysynda megapolısti ınfraqurylymdyq turǵydan damytý máselesine jeke toqtaldy, dep habarlaıdy QazAqparat.

Memleket basshysy Almatynyń Túrksib jáne Jetisý aýdandaryndaǵy eski úılerdi qaıta jańǵyrtý qajettigine nazar aýdardy.

Sonymen qatar kógaldandyrý, qaladaǵy tazalyqty saqtaý, qurylys kezinde seısmologııalyq qaýipsizdikti qamtamasyz etý, taýly aýmaqtardan jer telimderin berýge qatań baqylaý ornatý máseleleri jaıynda da aıtty.

– Jalpy Almatyda jer tapshy ekeni belgili. Biraq Bas prokýratýranyń málimetine qarasaq, qalada 3,7 myńnan astam gektar jer paıdalanylmaı otyr. Onyń bárin tolyqqandy ekonomıkalyq aınalymǵa engizý qajet, – dedi Prezıdent.

Sonymen qatar Qasym-Jomart Toqaev ákimdikke qala qurylysynyń ınteraktıvti kartasyn ázirleýdi usyndy. Bul, eń aldymen, osy saladaǵy jumystyń meılinshe ashyq bolýy úshin qajet.

Prezıdent qoǵamdyq baqylaýdyń qajettigin atap ótti.

Onyń sózinshe, qurylys júrgizý úshin Qoǵamdyq keńestiń kelisimi talap etiletin jerler kartada aıqyn belgilenýge tıis.