Almatyda 3,7 myń medıtsına qyzmetkeri ústemeaqy aldy

ALMATY. QazAqparat – Memleket basshysy Qasym-Jomart Toqaevtyń koronavırýspen kúresip jatqan medıtsına qyzmetkerlerine qarjylaı qoldaý kórsetý týraly tapsyrmasyna sáıkes, Almatyda 3758 mamanǵa ústemeaqy tólendi. Bul týraly qalalyq Qoǵamdyq densaýlyq saqtaý basqarmasy basshysynyń orynbasary Ásel Bısenbaeva aıtty, dep habarlaıdy QazAqparat tilshisi.

«COVID-19 ınfektsııasymen kúreste aıanbaı eńbek etip júrgen mamandar jumys qaýiptiligine qaraı 3 topqa bólingen. Táýekeldiń birinshi tobyna óte qaýipti jaǵdaıda jumys isteıtin 560 qyzmetker endi. Olarǵa 375 mln teńge tólendi. Ekinshi sanat qaýiptiligindegi dárigerler men feldsherlerge, ıaǵnı 2282 medıtsına mamanyna tólengen soma 722 mln teńgeni qurady.Úshinshi topqa 916 qyzmetker enip otyr. Olarǵa 167 mln teńge bólindi»,–deıdi Ásel Bısenbaeva.

Onyń aıtýynsha, medıtsına mamandaryna tólenetin ústemeaqy, arnaıy qurylǵan komıssııanyń sheshimine sáıkes júrgiziledi. Naýryz aıynda 1,2 mıllıard teńge tólendi.