Almatyda 2400 úı ortalyqtandyrylǵan aýyzsý júıesine qosylady

ALMATY. QazAqparat – Túrksib aýdanynda 2400 úı ortalyqtandyrylǵan sý júıesine qosylady. Bul týraly Almaty qalasy ákimdiginiń baspasóz ortalyǵynda aýdan ákimi Baqytjan Aqjarov málimdedi, dep habarlaıdy QazAqparat tilshisi.

Baqytjan Aqjarovtyń aıtýynsha, Almaty qalasynyń ákimi Baqytjan Saǵyntaevtyń tapsyrmasymen megapolıste ortalyqtandyrylǵan sý, elektr, gaz júıesine qosylmaǵan úılerdiń máselesin sheshý boıynsha aýqymdy jumys júrgizilýde.

«Aýdanda 3000 jeke menshik úı ortalyqtandyrylǵan sý júıesine qosylmaǵan. Barlyǵynyń jobalyq-smetalyq qujattary bar. Bıyl «Álmerek» jáne «Qaırat» yqshamýdany boıynsha jumystar aıaqtalady. Bul jobalar iske asqan soń 3000 úıdiń 2400-i ortalyqtandyrylǵan sý júıesine qosylady», - deıdi aýdan ákimi.

Aýdan ákimi qalǵan 600-700 úı boıynsha bıyl qajetti qujattar daıyndalatynyn atap ótti. Kelesi jyly osy úılerge sý qubyry tartylady.

Budan bólek, «Nıjnıı Pıatıletka» eldi mekeninde sýmen jabdyqtaý jáne káriz júıeleriniń qurylysy boıynsha JSQ ázirlendi. 4 myń úıdi ortalyqtandyrylǵan sýmen qamtamasyz etý josparlanyp otyr.

«Jospar boıynsha 2020 jyly — «Jas qanat» shaǵyn aýdanynda 530 úı jáne Zakarpatskaıa kóshesinde — 70 úı, «Almaty-1» vokzalynyń qazandyǵynda — 76 úı ortalyqtandyrylǵan sý júıesine qosylady. Jobalardy iske asyrý aıasynda 10 myń turǵyndy sýmen qamtamasyz etý kózdelgen»,– dedi ol.